УИХ-ын гишүүн С.Ганбаатар төв талбайд өлсгөлөн зарлаж, суулт хийгээд байгаа билээ. Тэрбээр алдагдсан "Оюутолгой"-г эргүүлж авах асуудлыг хөндөж, эрх баригчдыг олон улсын Арбитрын шүүхэд сөрөг нэхэмжлэл гаргах хүртэл өлсгөлөнгөө зогсоохгүй гэдгээ мэдэгдсэн. Түүнчлэн өөрийнх нь өлсгөлөн, суултыг дэмжиж байгаа УИХ-ын гишүүдийг нэгдэхийг уриалж, иргэдийг гарын үсгээ зурахыг хүссэн билээ. 

Тэгвэл түүнийг дэмжихээр ирсэн  иргэд  дунд Covid-19 халдвартай хүн  байгаа учраас төв талбайг хамгаалалтад авчээ. Төв талбайд бүртгэгдсэн сэжигтэй тохиолдлыг эмнэлгийн байгууллагын ажилтнууд тусгаарлан, авч явсан байна. Түүнчлэн түүний ойрын хавьтал болсон  хүнийг олж илрүүлэх шинжилгээ авч байна. 

 Тиймээс төв талбайн дотогш хэнийг ч нэвтрүүлэхгүй хамгаалалт аваад байгаа бөгөөд цагдаагийн байгууллагаас иргэдэд хүн хоорондын зай барихыг анхааруулж байна. Мөн талбай дээр ирээд буцсан иргэдийг гэртээ 7 хоног өөрийгөө тусгаарлахыг анхаарууллаа.