Манай улсад вакцинд хамрагдсан хүмүүсийн  40 орчим хувьд нь вакцины дараах урвал илэрч байна гэж мэдээллээ. 

ХӨСҮТ-ийн Дархлаажуулалтын албаны дарга О.Дашпагма: Нийслэлийн хэмжээнд 22 нэгжээр 9531 хүнийг вакцинд хамруулах ажлыг зохион байгууллаа. Тодруулбал, эрүүл мэндийн байгууллагын ажилтан, коронавирусийн хариу арга хэмжээнд оролцож байгаа багийн гишүүд, вакцинжуулах үйл ажиллагаанд дайчлагдан ажиллах бусад салбарын хүмүүсийг хамруулсан. Вакцинд хамрагдсан хүмүүсийн вакцины дараах урвал, хүндрэл, байдлыг дархлаажуулалтын хүрээнд тогтмол хянаж байгаа.

Вакцины заавар дээр заагдсан урвалууд вакцинд хамрагдсан хүмүүст илэрч байна. Нийт вакцинд хамрагдсан хүний 50-60 хувьд нь вакцины дараах хариу урвалууд илрэхээр байгаа.  Манай улсын вакцинд хамрагдсан хүмүүсийн 40 орчим хувьд нь вакцины дараах урвал илэрч байна. Тухайлбал, халуурах, толгой өвдөх, хөндүүрлэх шинж тэмдэг илэрч байгаа. Эдгээр шинж тэмдэг 2-3 хоногт алга болж байна. Шаардлагатай тохиолдолд шинж тэмдгийн эмчилгээг эмчийн заавраар хийнэ. Одоогийн байдлаар вакцины дараах  ноцтой хүндрэл, урвал бүртгэгдээгүй, дархлаажуулах үйл ажиллагаа хэвийн үргэлжилж байна.