Өнөөдөр болсон засгийн газрын ээлжит хуралдаанаар эдийн засгийн нөхцөл байдлыг хэлэлцжээ. Монгол Улсын Санхүүгийн тогтвортой байдлын зөвлөлийн гишүүд өнөөдрийн хуралдаанд оролцсон байна. 

Хуралдаанаас гарсан шийдвэрийн талаар Монголбанкны Ерөнхийлөгч Б.Лхагвасүрэн танилцууллаа. Тэрээр хэлэхдээ "Арилжааны банкуудаас зээл авсан олон иргэн, ААН банкуудад хандсан. Тэдний хүсэлтийг хэрхэн шийдвэрлэх талаар бид ярилцлаа. Нийт 1.5 их наяд төгрөгийн зээлтэй холбоотой асуудлаар санал хүсэлтээ бидэнд өгсөн. Тэдний 65 хувь нь ААН-ийн зээл байна. Цар тахлын үеийн бэлэн байдлыг нэгдүгээр сарын сүүлээс хойш зарласан. Үүнээс хойш гарсан санхүүгийн хүндрэлийг судалж байна. Зээл төлөлтийг хугацааг хойшлуулснаар зээлийн төлөх ёстой хугацаа нь хойшилно. Жишээлбэл 20 жилийн хугацааны зээл 20 жил гурван сар болно гэсэн үг.

Нийт зээлдэгчийн 90 гаруй хувь нь хувь иргэний хэрэглээний зээл байдаг. 90 хоногийн хугацаанд үндсэн зээл болон хүүг төлөх хугацааг хойшлуулж байна. Банкууд энэ хугацаанд хүүгийн төлбөр бодогдохгүй" гэв

 Хэрэглээний зээлэнд: машины лизинг, ипотекийн зээл, цалин, тэтгэвэр, малчин -ийн зээлүүд хамаарна. 120 хоногийн хугацаанд зээлийн ангилал бууруулах үйлдэл хийгдэхгүй бөгөөд өөрөөр хэлбэл, муу зээлдэгч гэсэн жагсаалтад орохгүй аж. Мөн онц байдал зарласан үеэс буюу Зээлийн хугацааг хойшлуулах хоногийг 2020.01.27-ноос эхлэн тооцно гэв.

Санхүүгийн зохицуулах хорооны дарга Д.Баярсайхан "Эдийн засаг хүндэрсэн өнөө үед муу  зээлдэгчид олшрох эрсдэлтэй. Муу зээлдэгч нэмэгдэх хэрээр банкууд Эрсдэлийн сангаа зузаатгах үүрэг хүлээдэг. Энэ нь банкуудын зээлд зарцуулах санхүүжилтийг бууруулах сөрөг үр дагавартай. Цаашлаад эдийн засгийн цусны эргэлт саарах зэрэг талтай. Иймд хэрэглээний зээлийн үндсэн өр, зээлийн хүү төлөлтийг царцаав. Бид өөр арга хэрэгслүүдийг ч авч хэлэлцэж байна" гэв.