Чингэлтэй дүүргийн Засаг дарга Ж.Эрдэнэбатыг тодорхой бус шалтгааны улмаас ажлаас нь халах гэж байгаа талаар өнөөдөр мэдээлэл хийлээ.

Чингэлтэй дүүргийн Засаг дарга Ж.Эрдэнэбат: "Дүүргийн засаг дарга Монгол Улсын хууль тогтоомжоор нутгийн удирдлагыг төрийн удирдлагатай хослуулж ажилладаг. Сонгогдохдоо дүүргийн иргэдийн төлөөлөгчдийн хурлын олонхийн саналыг авсан нэр дэвшигч томилогддог. Үүнийг дагуу 2016 оны аравдугаар сард томилогдсон. Өнөөдөр ИХТ-д Засаг даргыг огцруулах санал гаргаж, өргөн барьсан. Манай дүүргийн иргэдийн хурлын тэргүүлэгчид асуудлыг авч үзээд хурлын товыг гаргасан байсан. Хурлын тов гуравдугаар сарын 16-нд товлогдсон байсан. Гэтэл хоёрдугаар сарын 18-нд намын бүлгийн хуралтай гэж хуралдаад хот руу огцруулах санал хүргүүлсэн байна. Огцруулах үндэслэл шаардлага дээр байхгүй байгаа. Миний хувьд өөрийн хүсэлтээр өргөдлөө өгөхгүй хуулийн дагуу явна гэсэн байр суурьтай байна. Төрийн албаны ажил ямар нэгэн хувийн компанийн ажил биш. Нийт иргэдийн асуудал учраас төрийн ажил тасралтгүй явах хэрэгтэй. Улс төрийн албан тушаалтан сонгогдоод бүрэн эрхийнхээ хүрээнд ажиллах ёстой. Хотын даргад бичиг очсон эсэхийг мэдэхгүй байна. Хууль дүрмийн дагуу явах юм бол надад ажил, албан тушаалтай зууралдах зүйл байхгүй. Хамгийн гол нь хуулийн дагуу асуудлыг шийдэх ёстой.

ТӨРИЙН АЖЛЫГ ТАСЛАХГҮЙ ЯВУУЛАХ ХЭРЭГТЭЙ

Чингэлтэй дүүргийн иргэдийн хурлын дарга Д.Бат-Эрдэнэ: Төрийн албан хаагчдыг доромжилж, гүтгэж, ажлыг нь хүчээр булааж авах үйлдэл гаргаж байгаа. Хуулийн байгууллагад гомдол гаргасан бичгээ өгчихсөн байгаа. МАН-ын 18 төлөөлөгчийн шаардлага хурлын дарга болон Засаг дарга огцор гэдэг асуудал шүүхээр шийдэгдэх байх. Дүүргийн хэмжээнд сандал ширээтэй зууралдахаас илүүтэй дүүргийн 170 мянган гаруй иргэдийн амар тайван аюулгүй орчинд ажиллаж, амьдрах орчин нөхцөлийг бүрдүүлэх үүрэгтэй. Иймээс төрийн ажлыг таслахгүй явуулах хэрэгтэй.

НИЙСЛЭЛИЙН ЗАСАГ ДАРГА АА, ХУУЛИЙН ДАГУУ ЯВААЧ ИЙМ ЗҮЙЛ ДЭЭР ИРГЭД БИД ХОХИРДОГ

Чингэлтэй дүүргийн 17 дугаар хорооны иргэн Д.Отгонбаяр: Чингэлтэй дүүргийн ажил маш сайн явж байгаа. Иргэд хороондоо маш сайн санал бодлоо солилцдог. Одоо удахгүй сонгууль болох гэж байна. Энэ хугацаанд хийж байгаа ажил болон хийх гээд эхлүүлчихсэн ажил зөндөө байгаа. Энэ ажлыг нь хийлгэх хэрэгтэй. Өнөөдөр болж байгаа үйл явдал үнэхээр муухай байна. Одоо манай МАН-ынхан талцаж эхэлж байгаа бололтой. Ингэж болохгүй. Зөвхөн өөрт нь таалагдаж байгаа хүнээ дарга болгох гэж, зүгээр ажлаа хийж байгаа хүнийг ийм байдлаар ажлыг нь булааж болохгүй. Миний чинь хүсэл бол бүх зүйл үнэн байгаасай гэж боддог. Манай Чингэлтэй дүүрэгт нам төртэй, төр үйлчилж байна. Надад ашиг хонжоо харсан зүйл байхгүй. Дүүргийн намын дарга нарт хэлж байсан. Энэ үйл төвөөс явж байгаа үйлдэл. Хууль дүрэм гэж байгаа. Дарга нар, улс төрчид, УИХ-ын гишүүд, Ерөнхий сайд, Нийслэлийн Засаг даргаа хуулийн дагуу яваач. Ийм зүйл дээр иргэд бид хохирдог.