Хууль зөрчсөн Ц.Насанбат прокурорт УЕП Б.Жаргалсайхан хариуцлага тооцох уу? 

Улсын ерөнхий прокурорын газрын санаачилгаар хууль, хяналтын байгууллагын нэр бүхий ажилтнуудтай холбоотой гомдол, мэдээлэл хэргийг хянаж, шуурхай шалгаж шийдвэрлүүлэх Ажлын хэсэг байгуулагдсан. Шударга бустай тэмцэх УЕП-ын санаачилга бодит ажил хэрэг болж түрүүчээсээ олны дуулиан татаад буй хэргүүдэд анхаарлаа хандуулан ажиллаж эхэлсэн.

Нийслэлийн прокурорын газрын Орлогч прокурор Ц.Насанбатын нэр “Ариг” банкны гэх мэт олон ч хэрэг дээр дуулдах болсон. Улстөрчдийг хуулийн байгууллагаар оруулах схем боловсруулсан өмгөөлөгч Б.Баасанцогттой Ц.Насанбат прокурор уулзаж буй гэрэл зураг саяхан дэлгэгдсэн.

Гадаад улс оронд Монголын иргэнээ шалгуулахаар матсан, бичиг цаас бариад гүйгээд байгаа Ц.Насанбат прокурор УИХ-ын гишүүн Сү.Батболд нарын талаар гүтгэлэг бүхий ярилцлага өгч хууль эрх хэмжээгээ хэтрүүлэн яваа хуулийн ажилтан. 

   УИХ-ын гишүүн Сү.Батболдын хуульч нар болох Д.Батсүх, З.Сүхбаатар нарын хэвлэлд өгсөн ярилцлагаар ”Ц.Насанбат прокурор тодорхой хууль тогтоомжуудыг зөрчиж, улмаар олон нийтэд гүтгэлэг бүхий мэдээллийг санаатайгаар түгээсэн” гэдгийг баримттайгаар хэлсэн байна.

Иргэний хэрэг, маргааны үйл баримттай холбоотой асуудлаар Баянзүрх дүүргийн шүүх дээр иргэний хэрэг хянан шийдвэрлэх ажиллагаа явагдаж буй нөхцөлд төрийг төлөөлөн оролцож байгаа хэргийн тал болох прокурор гадаад улсад бие даан ажиллагаа явуулах эрх хуулиараа хэнбугайд ч байхгүй.

Гэтэл Ц.Насанбат прокурор Монгол Улсын нэрийн өмнөөс гадаад улсын шүүхэд нэхэмжлэл гаргаж, Монгол Улсын Засгийн газар, нэр бүхий төрийн байгууллагуудын нэрийг барьж яваа нь Монгол Улсын прокурор, хуулийн болон төрийн байгууллага, нэр хүндийг унагаж байна.

Иймд ашиг сонирхлын зөрчил гаргаж яваа прокурор Ц.Насанбатыг  Улсын ерөнхий прокурор Б.Жаргалсайхан шалгаж хариуцлага тооцох хэрэгтэй болжээ.

Б.АНХЗУЛ