Сүүлийн 24 цагт нийт 514 сорьцод PCR шинжилгээ хийхэд 508 хариу СӨРӨГ, 6 хариу ЭЕРЭГ гарлаа. Өмнөх батлагдсан тохиолдлуудын ойрын хавьтлаас нэмж халдвар илэрснээр Дархан-Уул аймагт КОВИД-19-ийн шинээр батлагдсан тохиолдол 30 боллоо.

Батлагдсан тохиолдлууд нь Өвөрхангай аймгийн “Сэмжид-Хужирт” сувилалд сувилуулсан 7, Сибирийн эрүүл мэндийн бүтээгдэхүүний худалдаа эрхлэгч 2, Эрүүл мэндийн 1 ажилтан, ХХҮГ-ын 1 ажилтан, эрүүл мэндийн байгууллагаар үйлчлүүлсэн 1 ахмад настан нийт 12 иргэн, тэдгээрээс үүдэлтэй халдварласан 18 хүн байна.

30 тохиолдлын 16 нь Дархан, 14 нь Шарын гол сумын иргэд байна. Одоогоор ойрын хавьтлын 169 иргэнийг ажиглан тусгаарлах байранд тусгаарлан шинжилгээ авч байна. Гэрийн тусгаарлалтад 512 иргэн байна.

Аймгийн Онцгой комиссоос энэ сарын 28-ны өдрийн 17:00 цаг хүртэл дараах ажлуудыг дуусгах үүрэг чиглэлийг холбогдох албаныханд өглөө.

- Нийтийн эзэмшлийн зам талбай, ААНБ-ын ариутгал халдваргүйтлийг дуусгах

- БШУЯамнаас шийдвэрлэж өгсөн 30 сая төгрөгийг зориулалтаар нь зарцуулж ЕБС, СӨБ-ын байгууллагуудын ариутгал халдваргүйтлийг хийх

- Томоохон худалдааны төвүүд болон дэд бүтцийн байгууллагууд өөрсдийн зардлаар нийт ажилчдынхаа 50 хүртэлх хувийг шинжилгээнд бүрэн хамруулах

Ковидын эсрэг дахлаажуулалттай холбоотой ажилд аймгийн Онцгой комисс, аймгаас сонгогдсон УИХ-ын гишүүд анхаарлаа хандуулан идэвхийлэн ажиллаж УОК, ЭМЯ-нд вакцин авах хүсэлтээ албан ёсоор хүргүүлэн ажиллаж байна. Маргаашнаас эхний ээлжийн вакцин ирэхээр болсон. Тэргүүн эгнээнд ажиллаж байгаа эрүүл мэндийн салбарын эмч, ажилчдыг эхлээд вакцинд хамруулахаар төлөвлөөд байна гэж Дархан-Уул аймгийн онцгой комиссоос мэдээллээ