Өнөөдөр ЭМЯ-аас коронавирусийн халдварын тархалтын талаарх ээлжит мэдээллээ хийлээ. Тус мэдээллийн үеэр  ХӨСҮТ-ийн Тандалт, судалгааны албаны дарга Ж.Байгалмаа сүүлийн 24 цагийн хугацаанд хийгдсэн коронавирус илрүүлэх шинжилгээний хариу болон шинээр батлагдсан тохиолдлуудын талаарх мэдээллийг өгсөн юм. 

Тэрээр " Сүүлийн 24 цагийн хугауцаанд улсын хэмжээнд нийт 18 лабораторид 10,652 хүнд коронавирус илрүүлэх шинжилгээг хийлээ. Эдгээрээс 377 хүнээс халдвар илэрч   нийт батлагдсан тохиолдол 8,447 болж байна. Эдгээрээс нийслэлд 328, орон нутагт 49 тохиолдол бүртгэгдлээ. 

Мөн нэг харамсалтай мэдээ байна. Энэ нь сүүлийн 24 цагийн хугацаанд хоёр хүн нас барсан таагүй мэдээ байна. Нас барсан хоёр иргэний хувьд, 69 болон 84 настай хүмүүс байсан. Ингээд коронавирусний халдварын улмаас халдвараар нас барсан тохиолдол 12 боллоо.

Сүүлийн үед коронавирусний халдварын ихээр нэмэгдэж байгаа бөгөөд энэ хэрээр халдварын улмаас биеийн байдал нь хүнд болсон хүний тоо нэмэгдэх хандлагатай байна.

Өнөөдрийн байдлаар гэрийн тусгаарлалтад 1,000 орчим өвчтөн эмчийн хяналтад байгаа бол 1,902 хүн эмнэлэгт хэвтэн эмчлүүлж байна. Мөн нийт эмчлүүлж байгаа хүмүүсийн биеийн байдлыг дүгнэвэл биеийн байдал нь хөнгөн 1,637, хүндэвтэр 219, хүнд 34 болон маш хүнд 12 хүн байна" гэлээ.