Эртний,тэр дундаа Хүннү гүрний үеийн нэн ховор олдворуудыг худалдах гэж байсан хүмүүсийг ЭЦА-ны ажилтнууд үйлдэл дээр нь баривчилсан тухай мэдээллийг Өнөөдөр сонинд нийтэлжээ.

Уг олдворын эзэн нь “Адам” гэх хочтой, хошин урлагийн “Эмоци” продакшны менежерээр ажилладаг М.Адъяаням хэмээх залуу бөгөөд өмнөд хөршийн иргэнд 650 гаруй сая төгрөгөөр худалдахаар тохиролцож байхад нь сатуулжээ.

Тэрбээр хууль сахиулах байгууллагынханд мэдүүлэг өгөхдөө “Шинжлэх ухааны гавьяат зүтгэлтэн, археологич Д.Эрдэнэбаатар ээжтэй минь хамтран амьдарч байсан юм. Амьдралд чинь хэрэгтэй бол зарж борлуулна биз гэж надад бэлэглэсэн” хэмээн мэдүүлсэн сурагтай.

Үүнтэй холбоотойгоор археологич, Шинжлэх ухааны гавьяат зүтгэлтэн Д.Эрдэнэбаатараас цагдаагийнхан тайлбар авахаар болоод буй гэнэ.

Археологич, Шинжлэх ухааны гавьяат зүтгэлтэн Д.Эрдэнэбаатар гэж хэн бэ?

Шинжлэх ухааны салбарт түүнийг Улаанбаатарын их сургуулийн Түүх-Археологийн тэнхимийн эрхлэгч, ШУ-ны гавьяат зүтгэлтэн, Археологич, доктор профессор гэдгээр нь мэднэ. Харин улс төрийн тавцанд Д.Эрдэнэбаатрыг Ерөнхийлөгч Х.Баттулгын баруун гарын хүн гэдэг. Тэр ч утгаараа Д.Эрдэнэбаатар нь 2017 оны Ерөнхийлөгчийн сонгуульд идэвхийлэн оролцож байсан хүний нэг юм.

Д.Эрдэнэбаатар нэгэн удаа “Угтаа, Баттулга гэдэг хүнтэй 2010 онд л анх уулзаж байв.  Гол модны булшийг малтан судлахаар олон жил судалгаа шинжилгээ хийж, хөрөнгө санхүүгээр гачигдахын эрхэнд тухайн үед ЗТБХБ-ын сайд байсан Х.Баттулгад хандаж, малтлага хийх тухайгаа танилцуулж, дэмжлэг хүссэн байдаг. Хариуд нь Х.Баттулга 250 сая төгрөгийн санхүүжилтийг хувиасаа гарган өгсөн” гэж ярьж байлаа.

Энэ үг нь Ерөнхийлөгч Х.Баттулга Археологич Д.Эрдэнэбаатар нарын харилцааг тодорхой харуулж өгөх юм. Дэлхийд нэн ховор тооцогдох хэдэн сая ам.доллароор үнэлэшгүй археологийн олдворууд археологич Д.Эрдэнэбаатарын ажлын ширээний нүдэнд хадгалагдаж байгаа гэх мэдээлэл байдаг. Тэгвэл тэрхүү соёлын өвүүд яагаад энэ хүний гарт улмаар хамтран амьдарч байгаад салсан хүүхнийх нь хүүхэд зарах гээд явж байдаг билээ.