Олимпийн аварга Н.Түвшинбаяр Улсын начин Э.Энхбатын биед ноцтой гэмтэл учруулсан гэх хэрэгт сэжиглэгдээд буй. Иймд өнгөрсөн ням гарагийн шөнө 23:00 цагт Н.Түвшинбаярыг Цагдан хорих 461-р анги руу ачсан. Улмаар Хан-Уул дүүргийн Эрүүгийн хэргийн анхан шатны шүүхээс түүнийг энэ сарын 25-ны өдрийг хүртэл цагдан хорих шийдвэр гаргасан юм.

Н.Түвшинбаярт Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.2 дахь заалтад зааснаар цагдан хорих таслан сэргийлэх арга хэмжээ авах нь зүйтэй гэж шүүхээс үзжээ.

Тэгвэл Н.Түвшинбаярыг шүүгч, прокурор, мөрдөгч, гэрч нарыг дарамтлан, сүрдүүлсэн гэсэн үндэслэлээр түүнийг цагдан хорьсон байж болзошгүй байгаа.

Учир нь Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.2 дахь заалтад “шүүгч, прокурор, мөрдөгч, хохирогч, гэрч, шинжээч, гэмт хэрэг хамтран үйлдсэн хүнийг дарамталсан, сүрдүүлсэн, эсхүл тэдгээрийн болон өөрийн амь нас, эрүүл мэндэд аюул учруулах үндэслэл бүхий баримт, мэдээлэл байгаа” бол шүүгч яллагдагчийг цагдан хорих шийдвэр гаргана гэж заажээ. 

Ерөнхийлөгчийн сонгуульд дахин нэр дэвшүүлэхийн тулд Х.Баттулга болон түүний багийнхан амиа өгөхөөс буцахгүй болсон. Өнгөтэй өөдтэй улстөрчдийг элбэж байгаад намнаж, эд хөрөнгөтэй хүнийг айлган сүрдүүлж булаах ажилдаа эрээ цээргүй ороод байна. Ингэх явцдаа Н.Түвшинбаяр эртний андаа хэвтэрт ортол нь зодоод буй. Түүгээр дуусахгүй байцаалт өгөхдөө шүүгч, мөрдөгч, прокурорыг сүрдүүлж байгаад хуулийн шүүхийн хариуцлагааас мултарчихна гэж бодсон ч түүний төлөвлөгөө талаар болж хоригдлоо.