Монгол Улсын Ерөнхийлөгч Х.Баттулга өөрийн шадар туслахаа шүүгчээр томилох гэж байгаа тухай мэдээлэл цацагдаад байна. Тодруулбал, Шүүхийн ерөнхий зөвлөлийн 2021 оны хоёр сарын 25-ний өдрийн 15-р тогтоолд нийслэл дэх захиргааны хэргийн анхан шатны шүүхийн шүүгчээр Лүндэнбазар овогтой Түвшинжаргалыг томилуулахаар нэр дэвшүүлсэн нь олон нийтэд ил боллоо. Ингэснээр Ерөнхийлөгч Х.Баттулга шүүх, хуулийн байгууллагад гар дүрж, өөрийн хонгилыг бий болгосон гэдэг нь батлагдаж байгаа юм. 

Ингэхэд шүүгчээр томилогдохоор нэр дэвшсэн, Ерөнхийлөгч Х.Баттулгын шадар туслах Л.Түвшинжаргал гэгч нь хэн бэ? Энэ талаар цөөн хэдэн баримтыг дэлгэе. 

1. Л.Түвшинжаргал нь 2006 оноос хойш Х.Баттулгыг дагаж гишүүн байхад нь ордонд, сайд байхад нь яам дээр туслахаар нь ажиллаж ирсэн одоо Ерөнхийлөгчийн шадар туслахаар ажиллаж байгаа нэгэн.  МУИС-ийг Хуульзүйн сургуулийг төгссөн хуульч, эрх зүйч мэргэжилтэй гэх боловч энэ салбарт ажилласан туршлага үгүй. Өөрөөр хэлбэл хууль, шүүхийн байгууллагын талаар “А” ч байхгүй гэж хэлж болно. 

2. 2016 онд цагдаагийн ерөнхий газрын эдийн засгийн гэмт хэрэгтэй тэмцэх тасгийнхан Л.Түвшинжаргалыг баривчлан саатуулж улсад 5 тэрбумын төгрөгийн хохирол учруулсан гэх асуудлаар шалгаж байсан. түүнийг шинэ төмөр зам төсөлтэй холбоотойгоор бусдыг залилан мэхэлсэн, мөнгө угаасан байж болзошгүй гэж үзэн саатуулж байсан билээ. Улмаар "хөхүүл" хүүхэдтэй хүнийг хорилоо гэж шуугиан дэгдээд, түр саатулах байранд өлсгөлөн зарлаж байсан. Хэрэг шүүхийн шатанд сураг алдарч, Х.Баттулгыг Ерөнхийлөгч болсноор бүр дарагдсан бараг хаагдсан гэх мэдээлэл бий. 

3. Х.Баттулга Үйлдвэр, худалдаа аж ахуйн сайдаар ажиллах байх үед Л.Түвшинжаргал тус яамны Хүнд үйлдвэрийн бодлогын газрын ахлах мэргэжилтэн ажиллаж байсан бөгөөд энэ үедээ тендерийн будлиан хийсэн гэх мэдээлэл бас цахим орчинд байна. 

Ерөнхийлөгч өөрийн шадар туслахаа шүүгчээр томилуулах гэж байгаа энэ асуудалд дараах дүгнэлтийг хийж болохоор байна. 

Нэгдүгээрт Х.Баттулгад үнэхээр хүний нөөц алга. Экс Ерөнхийлөгч Ц.Элбэгдорж нэгэнтээ “Х.Баттулгад хүний нөөц байхгүй, хулгайчийн нөөц л бий” гэж хэлсэн удаатай. Хоёрдугаарт Х.Баттулгад зүтгэгчид үнэнд гүйцэгдэж, эхнээсээ шийтгэл амсаж эхэлсэн учраас хууль, шүүхийнхэн Ерөнхийлөгчөөс зайгаа барьж эхэлсэн. Ингээд өөрийх нь талд зогсох шүүгчгүй болсон Х.Баттулга өөрийн шадар туслахаа шүүгчид зүтгүүлж байгаа юм.