“Юнивишн”, “Скаймедиа”, MNBC зэрэг кабелийн сувгийн хураамж дээрээ гуравдугаар сарын 1-ээс 2500-3500 төгрөг нэмж, хэрэглэгчдийн төлбөр өсчээ. Үүнтэйй холбоотойгоор иргэдийн дунд шүүмжлэл дагуулж байна. Тэгвэл нь  ямар учиртай нэгдэл вэ гэдэг дээр Монголын олон суваг дамжуулагчдын холбооноос мэдэгдэл гаргажээ. 

"Өргөн нэвтрүүлгийн тухай хууль” 2020 оны 7 дугаар сарын 01-ний өдрөөс хүчин төгөлдөр мөрдөгдөж эхэлсэн. Тус хуулийн 20 дугаар зүйлийн 20.5.3, 20.6, 26 дугаар зүйлийн 26.5, 26.6-д тус тус заасны дагуу олон суваг дамжуулах үйлчилгээ эрхлэгч нь өргөн нэвтрүүлгийн телевизийн сувгуудыг багтаасан “Үндсэн багц”-г үйлчилгээнд нэвтрүүлэх, тухайн багцын суурь хураамжаас “Өргөн нэвтрүүлгийн телевизийн үйлчилгээний хөлс” тооцож, өргөн нэвтрүүлгийн телевизүүдийн заавал гишүүнчлэлтэй, нийтийн эрх зүйн хуулийн этгээд болох Монголын телевизүүдийн холбоонд шилжүүлэх үүрэг хүлээсэн.

Монголын телевизүүдийн холбоо нь энэхүү хөлсийг төвлөрүүлэх ба хөлс нь өргөн нэвтрүүлгийн телевизүүдийн контентийн чанар, хүртээмжийг сайжруулах, үзэгч, олон нийтэд үндэсний түүх, соёл, уламжлал, хүүхэд, танин мэдэхүйн олон талт хөтөлбөр, нэвтрүүлэг бэлтгэн хүргэхэд бодит дэмжлэг болох юм. Иймд 2021 оны 3 дугаар сарын 01-ний өдрөөс эхлэн сар бүр олон суваг дамжуулах үйлчилгээний үндсэн багцын төлбөрт өргөн нэвтрүүлгийн телевизийн үйлчилгээний хөлс нэмэгдэж тооцогдохоор боллоо" гэжээ. 

Өөрөөр хэлбэл бидний өдөр тутамдаа тогтмол ашиглаж буй Юнивишн, Скаймедиа, MNBC, ДДШ, Монгол сат, Сансар кабел, Телеком Монголиаг хэрэглэгчид сар бүр дунджаар нэмэлт 3000 төгрөг төлнө гэсэн үг. Энэ нь байгуулагдаад удаагүй төрийн бус байгууллага УИХ-аар өөрт ашигтай хууль батлуулчихаад түүнээсээ их хэмжээний ашиг олж байна гэж иргэд шүүмжилж байна. Тиймээс энэхүү нэмэлтийг төлөхгүй, зөвшөөрөхгүй гэх сэтгэгдлүүдийг цахим хуудсанд үлдээж байгаа.