ИЗНН-ын удирдлагуудын зүгээс өнөөдөр төр нийгмийн нэрт зүтгэлтэн С.Зориг агсны хөшөөнд цэцэг өргөж хүндэтгэл үзүүллээ. Өнөөдөр С.Зориг агсны төрсөн өдөр тохиож байгаа юм.

Энэ үеэр ИЗНН-аас мэдэгдэл гаргаснаа танилцууллаа.

Тус мэдэгдэлд... 

“Улс төрийн намуудыг бүгдийг нь татан буулгаж, улс төрийн дахин хуваарилалтыг хийж, Үндсэн хуульд тунхагласан иргэдийнхээ эвлэлдэн нэгдэх эрх, гарааны тэгш боломжийг дахин эхлүүлэх  нь зүйтэй гэсэн зарчмын байр суурин дээрээ одоо ч хэвээрээ байна. Иргэдээ улс төрийн хамжлагат байдлаас  чөлөөлөх үйлсийг засаглал, эрх мэдлийн хүчээр биш, хуулиар, зөвхөн хууль санаачлан батлах замаар,  нийгмийн зөвшилцлийг ханган, олон түмний оролцоотой хийх нь зүйтэй гэж үзэж байна”  гэжээ.

ИЗНН-ын дэд дарга Б.Батбаатар хэлэхдээ: “С.Зориг агсны үзэл баримтлалыг манай нам баримталж, үйл ажиллагаандаа дээдлэн ажилладаг. Хувь хүний эрх, шударга ёсыг дээдэлсэн, ногоон хөгжлийн үзэл баримтлалтай, улс төрийн  хүчнийхээ  хувьд Монгол Улс парламентын засаглалтай, ардчилсан улс байх ёстой гэж үздэг.  Бид эрх мэдэл, түүнийг даган үүсч байдаг авлига, зүй бус ашиг сонирхол,  хүч түрсэн хууль бус аливаа үйлдэлтэй хэзээ ч эвлэрэхгүй. Монголын нийгмийг тунгалаг цэвэр байлгахын төлөө бид ажиллах болно” гэв.

Э.ТУЯА