Залуу бизнес эрхлэгчдийн зөвлөл ТББ Яармаг дахь Нийслэлийн нутгийн захиргааны цогцолбор барилгын A блокийн 1,000 мкв бүхий талбайд “Монгол, Солонгосын хамтарсан гарааны бизнесийг дэмжих төв” үйл ажиллагааг явуулахаар болжээ.
Төслийг БНСУ-ын талаас “КОЙКА” Олон улсын хамтын ажиллагааны байгууллага, Жижиг, дунд үйлдвэр, гарааны бизнесийн яам, Монгол Улсын талаас Нийслэлийн Шинжлэх ухаан, үйлдвэрлэл, инновацын газар болон төслийг санаачлагч “Залуу бизнес эрхлэгчдийн зөвлөл” ТББ нар хамтран хэрэгжүүлж байна. Энэ ТББ-ын удирдах зөвлөлийн тэргүүнээр Ерөнхийлөгч Х.Баттулгын охин Б.Намуун ажилладаг юм байна.
Монгол, Солонгосын хамтарсан гарааны бизнесийг дэмжих төв байгуулах төслийг Ерөнхийлөгч Х.Баттулга өөрөө хөөцөлдөж байж хэрэгжүүлэхээр болсон байна. Тодруулбал 2019 онд БНСУ-ын Ерөнхий сайд Ли Наг Ён 2019 онд Монголд айлчлах үеэр Ерөнхийлөгч Х.Баттулга хоёр орны залуу бизнес эрхлэгчдийг дэмжих, уялдаа холбоог сайжруулах зорилгоор Залуу бизнес эрхлэгчдийн зөвлөлийг БНСУ-ын ижил төстэй төрийн, хувийн байгууллагуудтай хамтран ажиллахыг санал болгожээ.
Ингээд 2020 оны эхээр Ерөнхийлөгч Х.Баттулга Дэлхийн эдийн засгийн чуулга уулзалтад оролцох үеэрээ БНСУ-ын Жижиг, дунд үйлдвэр, гарааны бизнесийн асуудал хариуцсан сайд Пак Ёонг-Сунтай уулзаж, энэ асуудлыг дахин тавьснаар төсөл хэрэгжих нөхцөл бүрдэж, ажил хэрэг болоод явж байна.
Энэхүү төслийг хэрэгжүүлэхэд шаардлагатай 4.5 сая долларын хөрөнгө оруулалтыг БНСУ-ын Засгийн газраас гаргаж байгаа гэх мэдээлэл байна.
Ш.ЦОГТ