Никитон хамтлагийн Б.Батчулуун нь дуучин С.Сэрчмаад хандаж “хүчингийн гэмт хэргийн шинжтэй” зүйл ярьж, тэд хөгжилдөн инээлдсэн нь олон нийтийн шүүмжлэлд өртөөд байсан билээ.

Тодруулбал, Б.Батчулууны нэгэн танил нь архидан согтуурч, улмаар нэгэн бүсгүйг согтууруулж, сэтгэцийн үйл ажиллагаа нь түр сарнисан, эсэргүүцэл үзүүлэх чадваргүй болсон үед нь хүчирхийлсэн байж болзошгүй зүйлийг ярьж, үл таних бүсгүйг тэд доромжлон инээлдсэн нь олон нийтийн дургүйцлийг ихээр хүргэсэн. 

Харин тэдний ярьсан зүйл нь гэмт хэргийн шинж агуулсан учраас дөрөвдүгээр сарын 11-ний өдөр ЦЕГ-аас албан ёсоор шалгаж эхэлсэн бөгөөд хэргийг харьяаллын дагуу Налайх дүүргийн цагдаагийн газарт шилжүүлэн шалгаж байгаа. Шалгагдаж буй хэргийн мэдээллийг прокурорын зөвшөөрөлтэй өгнө” хэмээн  ЦЕГ-ын Хэвлэл мэдээлэлийн төвийн дарга, хурандаа Б.Баатархүү мэдээлж байсан.

Гэтэл тус хэрэгт хамаарал бүхий хүмүүсийн өгсөн мэдүүлэгт тулгуурлан дээрх хэргийг “Гэмт хэргийн шинжгүй” хэмээн үзсэнээр хэрэг бүртгэлтийн хэрэг нээх, цаашлаад “Хэргийг үргэлжлүүлэн мөрдөн шалгах шаардлагагүй” хэмээн үзсэн гэх мэдээлэл байсан юм.

Бид энэ талаар ЦЕГ-ын Хэвлэл мэдээлэлийн төвийн дарга, хурандаа Б.Баатархүүгээс тодруулахад хэргийг харьяаллын дагуу Налайх дүүргийн цагдаагийн хэсэг шалгаж байгаа гэсэн мэдээллийг өглөө. 

Уг хэргийг Эрүүгийн хуулийн 12.1 дүгээр зүйл. Хүчиндэх буюу “Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн” гэх үндэслэлээр шалгаж байгаа бөгөөд хэрэв хэрэгт холбогдогчид гэм буруутай нь нотлогдвол үйлдсэн хэрэгтээ нэгээс таван жил хүртэлх хугацаагаар хорих ялаар шийтгүүлэх хуулийн заалттай юм.