АНУ-ын кино урлаг, шинжлэх ухааны академийн 93 дахь удаагийн шилдгүүдийг зарлах ёслол Лос-Анжелес хотын “Dolby Theatre”-т зохион байгуулагдаж байгаа билээ.

Оскарын эзэд ар араасаа тодорч байгаа энэ үед шилдэг эмэгтэй туслах дүрийг шагнал хүртсэн жүжигчин Юн Ё Жон шагнал авсан сэтгэгдлээ ийн илэрхийлжээ. 

Тэрээр "Та нарын мэдэж байгаачлан би Солонгос хүн. Яг миний нэр бол Юн Ё Жон. Гэхдээ ихэнхи чинь намайг Ё Юн,  Юү Жон гэж дуудаад байсан. Өнөөдөр бүгдийг чинь ингээд уучиллаа. Би дэлхийн нөгөө талд амьдардаг хүн болохоор Оскарыг зурагтын нэвтрүүлэг мэт үзээд суудаг байлаа. Тэгсэн би энд ингээд зогсож байгаадаа итгэж өгөхгүй л байна. Надад саналаа өгсөн Академийн гишүүддээ баярлалаа. Кино багийн хамт олондоо баярлалаа. Бид бүгд гэр бүл болчихсон. Найруулагч Исаакгүйгээр би энд зогсохгүй байх байсан. Тэр миний ахмад бас найруулагч минь байсан.

Би өрсөлдөөн тэмцээнд итгэдэггүй лдээ. Би яаж Glenn Close-ийг ялж чадах билээ дээ. Түүний олон сайхан дүрийг би үзэж байсан. Энэ төрөлд нэр дэвшсэн 5 нэр дэвшигчид бүгд өөр өөрсдийн кино, өөрсдийн дүрээрээ гарч ирсэн болохоор хоорондоо өрсөлдөх шаардлагагүй. Өнөөдөртөө би та нараас арай жаахан л азтай байлаа.

Мөн намайг ажиллах боломж өгдөг 2 хүүдээ баярлалаа гэж хэлмээр байна. Ээж нь хичээж ажиллаад үр дүн нь энэ шүү хүүхдүүд минь. Миний анхны тоглосон киног найруулсан найруулагч маань их сайхан сэтгэлтэй байсан. Баярлалаа. Намайг энэ шагналыг авч байгааг амьд сэрүүндээ харсан бол үнэхээр их баярлах байсан байх. Бүгдэнд нь маш их баярлалаа" гэжээ.

Сонирхуулахад, түүнийг тайзнаас буусны дараа нэгэн сэтгүүлч "Та Brad Pitt-ээс Оскарын шагналаа гардаж авлаа. Тэр ямархуу үнэртэй байсан бэ?" хэмээн асуужээ. Түүний хариуд жүжигчин Юн Ё Жон "Би огт үнэрлээгүй ээ. Ямар нохой байгаа биш дээ" хэмээн хариулсан байна.