Манай улсад коронавирусний гурван төрлийн вакцинаар иргэдээ дархлаажуулах ажлыг зохион байгуулж байгаа. Үүнтэй холбогдуулан иргэд вакциндаа хамрагдсан учраас амны хаалт зүүхгүй байж болно гэсэн ойлголтыг өөрсдөдөө төрүүлсэн нь нууц биш юм.

Коронавирусийн вакцин хоёр тунтай бөгөөд хоёр дахь тунг хийснээс хойш доод тал нь 3 долоо хоногийн дараа дархлаа бүрэн тогтдог.

Вакцин хийлгэсэн даруйд та яг л сум нэвтэрдэггүй хантааз өмссөн мэт хамгаалагдана гэсэн үг биш. 

Тиймээс иргэн та өмнө нь халдвар хамгааллын дэглэмээ хэрхэн барьж байсан түүн шигээ л тогтмол амны хаалтаа зүүж, гараа угааж, хүн хоорондын зайгаа барьж вирусээс өөрийгөө хамгаалах хэрэгтэй.

ЭМЯ-ны сайд С.Энхболдын өгсөн мэдээллээс үзвэл вакцин бол таныг халдвар авах магадлалыг тодорхой хувиар л бууруулж байгаа нэг арга. Вакцины хоёр тунгаа хийлгэсэн ч халдвар тээгч болох эсэхийг одоогоор хараахан тодорхойлоогүй байна гэсэн юм.

Мөн (CDC) АНУ-ын  Өвчний Хяналтын Газраас вакцин тариулсан иргэдэд хандан:

- Маск зүүх, бусдаас дор хаяж хоёр метрийн зайтай байх, олон хүн цугласан болон агааржуулалт муутай газар байхаас зайлсхийж өөрийгөө болон бусдыг хамгаалах арга хэмжээ авсан хэвээр байна.

- Коронавирусний улмаас хүнд өвчин тусах нас барах эрсдэлтэй хүнтэй уулзахаас зайлсхийх

- Коронавирусний улмаас хүндээр өвдөх өндөр магадлалтай хүний эргэн тойронд байгаа  вакцин хийлгээгүй хүнтэй уулзахаас зайлсхийх.

- Онцын шаардлагагүй тохиолдолд дотоод болон гадаад аялал жуулчлалыг хойшлуулах

- Шаардлагатай гэж үзэн аялал хийх бол CDC-ийн заавар, зөвлөмжийг дагаж мөрдсөн хэвээр байна.

- Хэрэв танд коронавирусний шинж тэмдэг илэрвэл шинжилгээнд хамрагдаж, өөрийгөө тусгаарлана.

Коронавирусний эсрэг вакцин нь өвчнөөс урьдчилан сэргийлэх, ялангуяа хүнд өвчин, үхлээс урьдчилан сэргийлэхэд үр дүнтэй байгаа хэдий ч үүсгэгч вирусийн эсрэг хэр үр дүнтэй болох, өвчний тархалтад хэрхэн нөлөөлөх, вакцинд хамрагдсан хүмүүсийг хэр удаан хугацаанд хамгаалах  зэрэг асуудлаар эрдэмтэд одоо хэр нь судалсан хэвээр байна. Мэдээж илүү олон хүмүүс вакцинд хамрагдсанаар үр дүн тодорхой болоход нөлөөлнө. Ямартай ч вакцин хийлгэсэн хүмүүс одоохондоо маск зүүх, бусадтай харьцахдаа хоёр метрийн зай барих, олон хүн цугласан болон агааржуулалт муутай газраас зайлсхийх зэрэг урьдчилан сэргийлэх арга хэмжээг авсан хэвээр байхыг сануулжээ.  

эх сурвалж: cdc.gov