Азийн аварга шалгаруулах тэмцээн, Азийн олимпын эрх олгох тэмцээнүүдэд оролцсон чөлөөт бөхийн шигшээ багийнхнаас коронавирусний  халдвар илэрчээ. 

Манай Үндэсний шигшээ багийн тамирчид дөрөвдүгээр сарын 07-ны өдөр Казахстан улсыг 43 хүний бүрэлдэхүүнтэй зорин Олимпийн эрхийн болон Ази тивийн аварга шалгаруулах тэмцээнд амжилттай оролцсон.

 Болгарын Софи хотод тавдугаар сарын 06-09-нд болох олимпийн эрхийн сүүлийн боломж тэмцээнд оролцох 5 тамирчин Казахстанд үлдээд бусад 35 тамирчин, шүүгч, багш, албаны хүмүүс эх орондоо ирээд тусгаарлалтад 5 хонож байна.

Шигшээ багийнхан Алматыд байх хугацаанд 2-3 удаа шинжилгээнд хамрагдсан ба дөрөвдүгээр сарын 21-ний өдөр буюу ирэхээсээ 2 өдрийн өмнө шинжилгээ өгч сөрөг гэсэн хариу аваад тусгай үүргийн онгоцонд суужээ.

Харин Монголд ирээд тусгаарлах байранд өгсөн шинжилгээгээр хэд хэдэн тамирчдын хариу эерэг гарсан бөгөөд тамирчдын биеийн байдал хэвийн ил шинж тэмдэг байхгүй хөнгөн хэлбэрийн шинжтэй байна гэж Чөлөөт бөхийн холбооноос мэдээллээ.

Казахстаныг зорихоос өмнө буюу гуравдугаар сарын 10-ны өдөр манай бүх тамирчид вакцины 1-р тунг хийлгэсэн байсан юм.

Мөн тэмцээнд оролцсон Япон, Өмнөд Солонгос, Киргиз, Ираны тамирчдаас халдвар илэрсэн бол Казахстанд үлдсэн шигшээ багийн тамирчдын хариу сөрөг гарсан байна.

Эх сурвалж: Монголын Чөлөөт Бөхийн Холбоо