Засгийн газраас энэ сардаа багтан “Спутник В” вакциныг оруулж ирнэ хэмээн мэдээлсэн. Гэвч одоогоор тус вакциныг оруулж ирээгүй бөгөөд вакцины татан авалтын гэрээ хэлцлийг түвшинд байгаа хэмээн УОК, Засгийн газрын холбогдох хүмүүс мэдээлсэн байна.  

Гэтэл цахим орчинд “Орос ах нарын бүтээсэн “Спутник В” вакциныг л найдвартай” гэсэн утга агуулгатай пост, мэдээлэл ихээр явж байгаа нь нууц биш. Манай улсад “Вероцелл” болон  “AstraZeneca” вакцинаар иргэдээ дархлаажуулж байгаа ч иргэд эдгээр вакцинд итгэх итгэл суларсаар байна.

Эх сурвалжийн мэдээлж байгаагаар ОХУ манай улсад вакцин нийлүүлэхээр болбол ирэх 5,6-р сараас л орж ирэх гэнэ. Учир нь ОХУ-д цар тахлын нөхцөл байдаг хүндрэхийн зэрэгцээ вакцин үйлдвэрлэлтийн ажил маш удаашралтай байгаа талаар тус улсын хэвлэл мэдээллийн хэрэгслүүд мэдээлжээ. Мөн нэн түрүүнд ОХУ өөрийн иргэдийг дархлаажуулж дууссаны дараа вакцин экпортлоно гэснээр "Спутник В" вакциныг илүү удаан хугацаанд хүлээх нөхцөл байдал үүсээд байгаа юм.

Энэ талаар ХӨСҮТ -ийн Дархлаажуулалтын албаны дарга О.Дашпагма: Манай улсын хэрэглэж буй коронавирусийн эсрэг вакцинууд нь тухайн хүнд дархлаа тогтоох нь судалгаагаар тогтоогдсон учраас л дэлхий дахин хэрэглэхийг зөвлөж байгаа. Бид мэргэжлийн байгууллагуудтай хамтран Монгол Улсад хийгдсэн вакцинуудын дархлаа тогтцын түвшин нь хэр байгаа талаарх судалгааг улсын хэмжээнд зохион байгуулж байна. Хүн бүрт харилцан адилгүй дархлаа тогтож байгаа. Вакцин нь халдвараас сэргийлэхээс гадна хүндрэлээс сэргийлнэ. Тиймээс иргэд маань заавал ОХУ-ын вакциныг хүлээлгүйгээр одоо хэрэглэж байгаа вакцинуудаас хийлгэхийг уриалж байна” гэлээ.