УИХ-ын гишүүн Б.Дэлгэрсайхан, Т.Энхтүвшин нар тойрогтоо ажиллаж уулзалт хийх үедээ Замын-Үүд-Эрээний гаалиар экспорт, импортын ачаа тээврийн үйлчилгээ эрхэлдэг жолооч нарыг “ЗОЛБИН” хэмээн хэлсэн нь олон нийтийн дургүйцлийг ихээр хүргэж байна.

Эдгээр өдрүүдэд тэд сонгогдсон тойрогтоо ажиллаж байгаа бөгөөд энэ хүрээнд  Зам-Үүд сумын төрийн албан хаагчидтай уулзжээ. Энэ үеэр УИХ-ын гишүүн Б.Дэлгэрсайхан ийн хэлсэн байна.

Тэрээр “Улаанбаатараас ковид зөөвөрлөгдөж ирэх магадлал өндөр. Цагдаагийн дарга нь хил дээр хэвтэж байхаар “Мал бааз” дээр очиж ажлаа хийгээч. Улаанбаатарас ирж байгаа золбин жолооч нар энэ өвчнийг чирж ирнэ шүү. Дорноговийн жолооч нар чирж ирнэ гэж бодохгүй байна” гэжээ.  

Түүний ийн хэлсний дараагаар жолооч нар бид “Мал бааз” гэх газарт тусгаарлагдан үлдэж цааш солилцооны жолооч нарт машин болон ачаа тээврээ өгч явуулан хилээр гаргуулдаг. Харин солилцооны жолооч нар тээврийн хөлсийг албаныхантай хуйвалдан, дураараа нэмж байгаа гэх мэдээлэл байгаа. Жолооч нарын хувьд “Мал баз” дээр тусгаарлагдаж тусгаарлалтын мөнгө, хоолны мөнгөө гаргадаг. Өөрсдөө үйл ажиллагаагаа уялдуулахгүй, хүнд сурталдаж үнэ нэмж байж эцэст нь бидэн рүү бурууг чихэж болохгүй. Газар, газраас ирсэн аавын хөвгүүд амьдрах гэж ажил хийж явна. Ингэж ялгаварлаж, золбингоор нь дуудаж байгаад харамсаж байна” гэжээ.

Одоогийн байдлаар Замын-Үүдийн гаалийн хяналтын хашаанд 230 автомашин хилээр гарахаа хүлээж байгаа бол шороон зам дээр 300-400 машин мөн дугаараа хүлээн зогсч байна. Учир нь БНХАУ-аас өдөрт хийх таталтыг 20 болгон багсгасан юм.