Нэг сарын дараа Монгол Улсын зургаадахь Ерөнхийлөгч тодрох гэж байна. Энэ үед одоогийн Ерөнхийлөгч Х.Баттулгатай холбоотой тэр дундаа түүний нэр холбогдсон дуулиан дагуулсан хэргүүдийг бүрэн эрхийн хугацаа дууссаны дараа шалгах ёстой гэж цахим орчинд давалгаалж байна. 

Эдийн засагч Л.Наранбаатар Тавантолгойд барих ёстой байсан төмөр замыг бариагүйгээс болоод Монгол Улс 10 тэрбум ам.долларын алдагдал хүлээсэн гэж мэдэгдээд Ерөнхийлөгч Х.Баттулгын хэргийг дахин сэргээж дахин шалгах ёстой гэж хууль хяналтын байгууллагад хандаад байгаа билээ. 

Мөн Ерөнхий сайд асан У.Хүрэлсүх ТЕГ, ЦЕГ-ын удирдлагуудыг дуудаж, “Эрдэнэс Тавантолгой” компаниас санхүүжиж буй төмөр замын төслүүдийг Сангийн яам, Үндэсний аудитын газар оролцуулан шалгах чиглэл өгсөн байдаг.

Хэргийг эргэн сануулахад... 2015 онд Эрүүгийн цагдаагийн газрын Эдийн засгийн гэмт хэрэгтэй тэмцэх хэлтэс, АТГ-аас Ухаахудаг-Гашуунсухайт чиглэлийн 267 км төмөр замтай холбоотой асуудлаар тухайн үеийн УИХ-ын гишүүн, одоогийн Ерөнхийлөгч Х.Баттулгыг шалгаж эхэлсэн. 

Тухайн үед Зам тээврийн яамны Төрийн нарийн бичгийн дарга асан, “Монголын төмөр зам” ТӨХК-ийн ТУЗ-ийн дарга Б.Батзаяаг цагдан хорьж, Төрийн өмчийн хорооны даргаар ажиллаж байсан Д.Цогтбаатар, “Монголын төмөр зам” Төрийн өмчит хувьцаат компанид төслийн хэлтэст хэлтсийн даргаар ажиллаж байсан А.Зориг, БНСУ-ын иргэн, “Самсунг Си энд Ти” компанийн захирал Лий Жон Ёл, “Соён инженеринг” компанид зургийн инженерээр ажиллаж байсан Гу Ду Хёон нарыг дээрх хэрэгт холбогдуулан шалгаж, олон улсад эрэн сурвалжилж байсан. 

2017 оны есдүгээр сард Ерөнхийлөгч Х.Баттулгад холбогдох хэргийг хэрэгсэхгүй болгох шийдвэрийг Нийслэлийн прокурорын газраас танилцуулсан. Ингээд Х.Баттулга Ерөнхийлөгч болмогцоо өөрийнхөө төмөр замын хэргийг хэрэгсэхгүй болгож, 280 сая ам.доллар салхинд хийж, Монгол улс төмөр зам биш овоолсон шороотой үлдсэн түүхтэй.