Улс төрийн намууд Ерөнхийлөгчийн сонгуульд нэр дэвшигчдээ тодрууллаа. Өнөөдрөөс нэр дэвшигчдийн материалыг бүрдүүлж, СЕХ-д хүргүүлэх хуулийн хугацаа эхэлж байна.

МАН-аас Ерөнхий сайд асан У.Хүрэлсүх нэр дэвшинэ. АН тус тусдаа нэр дэвшигч тодруулсан бөгөөд М.Тулгатын намаас С.Эрдэнэ, О.Цогтгэрэлийн намаас Н.Алтанхуяг нэр дэвшихээр боллоо. 

Харин “Зөв хүн” электорат эвслээс "Датаком" ХХК-ийн үүсгэн байгуулагч Д.Энхбатыг  Ерөнхийлөгчийн сонгуульд нэр дэвшүүлэхээр болсон.

Энэ талаар УИХ-ын гишүүн, ХҮН-ын дарга Т.Доржханд мэдээлэхдээ... Зөв ХҮН электорат" эвслийн зүгээс нэр дэвшигчдэд эрдэм мэдлэгтэй, хийсэн ажилтай, хар мөргүй хүн байх ёстой гэсэн үндсэн шаардлагыг тавьсан” гэсэн юм.

Ингэснээр Д.Энхбат нь ХҮН-аас бус Зөв хүн электорат эвслээс нэр дэвшиж байна. Энд нэг анхаарал татах зүйл нь Ерөнхийлөгчийн сонгуульд УИХ-д суудалтай намаас нэр дэвшүүлэх эрхтэй байдаг.

Үндсэн хуулийн 31-р зүйлийн 2-т... Улсын Их Хуралд суудал бүхий нам дангаараа буюу хамтран Ерөнхийлөгчид тус бүр нэг хүний нэр дэвшүүлнэ гэж заажээ.

Зөв хүн электорат эвсэлд Хөдөлмөрийн Үндэсний Нам, Монголын Социал Демократ Нам, Зүй Ёс Намууд багтаж байна. Эдгээр намуудаас зөвхөн Хөдөлмөрийн үндэсний нам УИХ-д ганцхан суудалтай. Тэгэхээр Д.Энхбат ХҮН-аас бус Зөв хүн электорат эвслээс Ерөнхийлөгчийн сонгуульд нэр дэвших нь хуулийн хүрээнд боломжгүй юу?

Өөрөөр хэлбэл Д.Энхбат нь эвслээс бус Хөдөлмөрийн үндэсний намаас Ерөнхийлөгчийн сонгуульд нэр дэвших боломжтой гэсэн юм. Тус эвсэлд багтаж байгаа гурван намын хоёр нь УИХ-д суудалгүй билээ.