Өнөөдөр Засгийн газрын ээлжит хуралдаанаар хэлэлцсэн асуудлаар Шадар сайд С.Амарсайхан, Эрүүл мэндийн сайд С.Энхболд, Сангийн сайд Б.Жавхлан нар мэдээлэл хийлээ. 

Энэ үеэр Шадар сайд С.Амарсайхан: Бусад улс оронд тэр болгон вакцин олдохгүй байгаа. Манай улсын хувьд вакцины нийлүүлэлт харьцангуй сайн байна. Одоогоор 1 сая 138 мянган иргэн вакцинжуулалтад хамрагдсан байгаа бөгөөд давтан тунд 25 хувь нь хамрагдаад байгаа.

Тавдугаар сарын 8 гэхэд нийт иргэдээ вакцины нэгдүгээр тунд хамруулж дуусгах зорилготой байна. Мөн зургаадугаар сард орон нутгийн нийт иргэдэд нэг, хоёрдугаар тунг хийж дуусгах зорилт тавьж байна. Ингэснээр нийгэм эдийн засгийн үйл ажиллагааг хэвийн явуулах нөхцөл бүрдэнэ.  

Түүнчлэн Засгийн газар тавдугаар сарын 1-нээс хил нээхээр шийдвэрлэсэн байсан ч коронавирусний цар тахлын тархалт тооцоолсон хэмжээнд буурахгүй байгаа учраас  нөхцөл байдлыг харгалзан, хил нээх хугацааг зургаадугаар сарын эхэн хүртэл хойшлуулах шаардлагатай гэж үзсэн" гэлээ.