Элсэлтийн ерөнхий шалгалтын онлайн бүртгэл өчигдөр буюу тавдугаар сарын 5-ны 18 цагт дуусгавар боллоо. Бүртгэлийн хугацаа, цагийг сунгахгүй ба нэмэлт бүртгэл хийхгүй. 2021 оны ЭЕШ 07-р сарын 01-04-ний өдрүүдэд зохион байгуулагдана.  Энэ жилийн ЭЕШ-д хэдэн шалгуулагч бүртгүүлсэн, Монгол хэл бичгийн шалгалтыг хэзээ авах зэрэг асуудлаар БҮТ-ийн элсэлтийн шалгалт хариуцсан ахлах мэргэжилтэн М.Болдсайханаас тодрууллаа. 

- ЭЕШ-ын бүртгэл албан ёсоор дуусгавар боллоо. Хэдэн шалгуулагч бүртгүүлсэн байна вэ?

Энэ жилийн шалгалтад нийт 40 420  шалгуулагч бүртгүүлжээ. Үүнээс энэ онд ЕБС-ийн 12-р ангийг төгсөж байгаа 31 782 сурагч байгаа бол өмнө оны 8638 шалгуулагч бүртгүүлсэн байна. Энэ жилийн ЭЕШ-ын шалгалтын даалгаврыг танхимаар судалсан агуулгад түшиглэж шалгалтын материалыг боловсруулна. Мөн БҮТ-өөс энэ жилийн ЭЕШ-ын химийн хичээлийн ерөнхий Блюпринт гаргасан. 

- Монгол хэл, бичгийн шалгалтыг авах хуваарь гарсан уу? 

Ирэх долоо хоногийн Засгийн газрын хуралдаанаар босго оноо, ЭЕШ-ын зохион байгуулалт, Монгол хэл, бичгийн шалгалтын талаар хэлэлцэж, шийдвэрлэнэ. 

- Шалгуулагчаас коронавирусийн PCR шинжилгээний хариу шаардах уу? Вакцинд хамрагдсан байх ёстой юу?

Иргэдийн дунд ЭЕШ өгөх сурагчид "заавал вакцинд хамрагдсан байх ёстой" гэсэн таамаг яриа байна. ЭЕШ өгөх шалгуулагчид албан ёсоор вакцинд хамрагдсан байх гэсэн шаардлага тавих шийдвэр гараагүй. 

- Энэ жил ЭЕШ-ыг хэдэн шалгалтын байранд зохион байгуулах вэ?

Энэ жилийн ЭЕШ-ыг  100 шалгалтын байранд зохион байгуулна.