Афганистаны эрх баригчид нийслэл Кабул дахь Пул-э-Чархи шоронд хоригдож байсан хэт даврагч “Талибан” хөдөлгөөний гишүүн 100 хоригдлыг суллан тавилаа гэж Tolo News телевиз мэдээлснийг РИА Новости агентлаг дамжуулжээ. Телевизийн мэдээлснээр тэднийг тавдугаар сарын 2-ны бямба гарагт сулласан гэнэ. АНУ-тай байгуулсан хэлэлцээрийн дагуу нийтдээ 5000 орчим хоригдлыг чөлөөлөх ёстой гэж Талибан хөдөлгөөн шаардаж байгаа ч Афганы эрх баригчид юутай ч 1500 хүнийг суллах шийдвэр гаргаад байна. Талибын хоригдлуудад өршөөл үзүүлж, суллах тухай зарлигт Афганистаны Ерөнхийлөгч Ашраф Гани гарын үсэг зурлаа гэж гуравдугаар сарын 10-нд мэдээлсэн.
АНУ, Талибан хөдөлгөөний төлөөлөгчид өнгөрсөн хоёрдугаар сарын 29-нд Катарын нийслэл Доха хотноо хэлэлцээр эцэслэснээр талибууд засгийн газрын эрсэг байлдааны ажиллагаагаа зогсоохоор тохирсон ч гуравдугаар сарын 2-нд талибууд байлдааны ажиллагаагаа сэргээж байгаагаа мэдэгдээд байгаа. Талибан хөдөлгөөн нь Афганистанд иргэний дайн ид болж байсан 1994 онд байгуулагдаж 1996-2001 онуудад засгийн эрх барьж байгаад 2001 онд эрх мэдлээ алдангуут Афганистан, Пакистаны нутаг дэвсгэрт Засгийн газрын болон НАТО-гийн хүчний эсрэг партизаны дайн хийх болсон. Нью-Йоркт болсон 2001 оны есдүгээр сарын 11-ний халдлагын дараа АНУ өөрийн цэргээ Афганистанд оруулсан.