Эрүүл мэндийн яам нөхцөл байдлын талаар ээлжит мэдээллээ хийлээ. Мэдээллийн эхэнд ЭМЯ-ны хэвлэлтйн ажилтан Б.Ууганбаяр сүүлийн 24 цагт дотоодод бүртгэгдсэн халдварын тархалтын талаарх тоон мэдээллийг хүргэлээ.

Тэрээр "Сүүлийн 24 цагийн хугацаанд 477 хүнээс коронавирусийн халдвар илэрлээ. Ингэснээр улсын хэмжээнд нийт халдварын тоо 45,936 болж байна.

Шинээр батлагдасан тохиолдлын 448 нь Улаанбаатар хотод, 25 нь орон нутагт бүртгэгдсэн бол дөрөв нь эмнэлгээс шалтгаалах халдвар байна.

Өнгөрсөн 24 цагт 1,570 хүн эдгэрсэн бөгөөд эмнэлгээс 592, гэрийн тусгаарлалтаас 978 хүн эдгэрч гарчээ. Ингэснээр нийт эдгэрсэн хүний тоо 34,230 боллоо.

Түүнчлэн өнгөрсөн хоногт есөн хүн нас барсан харамсалтай мэдээлэл байна. Тодруулбал, 41-90 насны есөн хүн халдварын нэн хүнд хэлбэрээр эмнэлэгт хэвтэн эмчлүүлж байгаад нас баржээ. Монгол улсын хэмжээнд коронавируст халдварын шалтгаант нас баралт нийт 179 боллоо.

Өнөөдрийн байдлаар халдварын улмаас 4,631 хүн эмнэлэгт хэвтэн эмчлүүлж байгаагаас хөнгөн 2,510, хүндэвтэр 1,487, хүнд 524, маш хүнд оноштой 110 хүн байна" гэлээ.