Алдарт жүжигчин Том Круз “Алтан бөмбөрцөг” наадмын шүүгчдийн зарим төлөөлөл арьс өнгөөр ялгаварлан гадуурхах явдал байгааг эсэргүүцэн тус наадмаас авсан шагналуудаа эргүүлэн өгчээ.

Тэрээр “Алтан бөмбөрцөг” наадмаас 1990 онд “Долдугаар сарын 4-нд төрсөн хүн” (Born on the Fourth of July , 1989) кинонд бүтээсэн ахмад дайчин Рон Ковикийн дүрээр, 1997 онд  "Жерри Магуайр" кинонд бүтээсэн спортын сэтгүүлч Жерри Магуайрын дүрээр шилдэг эрэгтэй жүжигчний шагналыг хүртэж байсан бол 2000 онд "Магнолия" (Magnolia, 1999) кинонд бүтээсэн дүрээрээ шилдэг эрэгтэй туслах жүжигчний шагналыг тус тус хүртэж байсан юм. 

Том Крузээс гадна “Алтан бөмбөрцөг” шагнал гардуулах ёслолыг жил бүр шууд дамжуулан үзүүлдэг “NBC” телевиз мөн дээрх шалтгаанаар ирэх оны ёслолыг дамжуулахаас татгалзсан юм. Үүний улмаас дараа жилийн “Алтан бөмбөрцөг” кино наадмыг ямар телевиз шууд дамжуулах нь тодорхойгүй байгаа аж.

HFPA нь 86 сэтгүүлчтэй бөгөөд гишүүдийн бүрэлдэхүүнд өнгөт арьстнуудын нэг ч төлөөлөл байхгүй бөгөөд эхний ээлжид дотроо шинэчлэл хийх хөтөлбөрийг хэрэгжүүлэхээр болсон байна. Улмаар тэд гишүүдийнхээ дунд өнгөт арьст сэтгүүлчдийг багтаахаас гадна гишүүддээ бэлэг авахыг хориглохоор төлөвлөж байгаа талаар Hollywood reporter мэдээлжээ.

эх сурвалж: Hollywoodreporter