УИХ-ын гишүүн С.Одонтуяа, түүний нөхөр Г.Өлзийбүрэн нар вакцин таталтад нөлөөлсөн асуудлаар хуулийн байгууллагаас шалгагдахаар болсон.

Ерөнхий сайд өмнө нь “Манай зарим улстөрчдийн хариуцлагагүй үйлдэл вакцины татан авалтад нөлөөлсөн байна. Шаардлагатай бол тэр УИХ-ын гишүүдийн нэрийг зарлана” гэсэн мэдэгдэл хийж байсан бол саяхан нэрийг нь зарлаж, "УИХ-ын дэд дарга С.Одонтуяа гэр бүлийн хүний хамт дээрх үйлдлийг хийсэн. Зарим хэвлэлийнхэнтэй ярьж, гаалийн байцаагч нар руу утасдаж, дарамталсан асуудал гарсан. Энэ асуудлыг  шалгуулна” гэсэн.

Баабар энэ талаар “Манай хувийнханд спутник битгий худалдаарай гэж танай Элчин сайдын яамнаас анхааруулсан” гэж оросын үйлдвэрлэгчид хэлсэн тухай би өмнө нь жиргэж байсан” гэж твийтэрт бичжээ. Баабар өмнө нь бичихдээ “ОХУ-д суугаа Элчин сайд руу ярьж, хувийн хэвшилд спутник вакцин битгий өгөөрэй гэж улстөрчид нөлөөлсөн” гэх утга агуулгаар бичиж байсан билээ. С.Одонтуяа нь хэний үүрэг даалгавраар вакцин таталтад нөлөөлөв. Вакцин хийлгэхгүйг хэний талаас эсэргүүцэж байсан билээ гээд бодохоор Ерөнхийлөгч Х.Баттулгатай ч холбогдож мэднэ.

Юутай ч С.Одонтуяагийн чаат олон нийтэд задарсн бөгөөд вакцины таталтад нөлөөлөх гэсэн нь илчлэгдсэн ч тэрээр “Би ийм үйлдэл хийгээгүй. Засгийн газрын үйл ажиллагааг шүүмжлэхээр ингэж гүтгээд байна” гэсэн тайлбарыг өгчээ.

Б.НАРАН