Засгийн газрын ээлжит хуралдааны шийдвэрийг танилцууллаа. Сар бүр олгодог "Хүүхдийн мөнгө"-ийг дөрөвдүгээр сарын 1-ээс аравдугаар сарын 1 хүртэлх хугацаанд 100 мянган төгрөг болголоо. Ингэснээр одоо олгож буй 30,000 төгрөгийг 70 мянгаар нэмэгдүүллээ. Дөрөвдүгээр сарын "Хүүхдийн мөнгө"-ний 70 мянган төгрөгийг нөхөж дансанд нь шилжүүлнэ.

Харин 2020 оны тавдугаар сарын 1-нээс аравдугаар сарын 1-нийг хүртэл:

• Нийгмийн халамжийн дэмжлэг шаардлагатай бага орлоготой 122,000 хүнд сар бүр 16 мянган төгрөгийн хүнсний талон олгодгийг 32 мянган төгрөг, хүүхдэд 8 мянган төгрөг олгодгийг 16 мянга болгож нэмэгдүүллээ.
• Нийгмийн халамжийн сангаас тэтгэвэр авдаг 3,600 өндөр настан сардаа 188 мянган төгрөг авдаг бол 100 мянган төгрөг нэмж 288 мянган төгрөг болгож байна.
• Өнчин хүүхдүүдэд 100,000 төгрөг нэмж, 288 мянган төгрөг олгож байхаар боллоо.
• Өрх толгойлсон 4-өөс дээш хүүхэдтэй эцэг, эхчүүдэд 100,000 төгрөг нэмж, 288 мянган төгрөг болголоо.

Малчдын орлого болон ноолуурын салбарын дотоод үйлдвэрлэлийг дэмжих зорилгоор ноолуурын кг тутамд 20,000 төгрөгийн урамшуулал олгоно. Эдгээр дэмжлэгт нийт 793.6 тэрбум төгрөг зарцуулах тооцоо гарчээ.