АН-аас сонгуулийн хар машиныг хакердаж, санал луйвардсан гэх үнэн худал нь мэдэгдэхгүй асуудлыг гарган ирж, Ерөнхийлөгчийн сонгуулийг хойшлуулах ёстой гэж мэдээлж эхлэв. Өчигдөр УИХ-ын чуулганы хуралдаанаар Ерөнхийлөгчийн сонгуулийн тухай хуульд оруулсан нэмэлт, өөрчлөлтөд тавьсан Ерөнхийлөгчийн хоригийг хэлэлцсэн. Энэ үеэр УИХ дахь АН-ын нэр бүхий гишүүд “хар машиныг хакердаж болдог, 2020 оны УИХ-ын үр дүнг хакердсан. Цаашлаад Ерөнхийлөгчийн сонгууль хүчингүй болох магадлал байгаа шүү” гэх мэтээр ярилаа. АН-ын бүлгийн гишүүд хэний дохиур зангаагаар үг хэлэв. 

Олон нийтэд өгч буй энэ мессэжээрээ АН-аас болоогүй сонгуулийн өмнө Ерөнхийлөгчийн сонгуулийн үр дүнг зөвшөөрөхгүй гэх ойлголтыг олон нийтэд өгөхийг зорьж байгаа бололтой. Хар машиныг хакердаж болдог гэдэг ойлголтыг нийгэмд тарааж, цаашлаад Ерөнхийлөгчийн сонгуулийн үр дүнг зөвшөөрөхгүй гэх нэрийдлээр улс төрийн жагсаал цуглаан эхлүүлж, ард түмнийг турхирахаар байна гэж сошиал орчинд олон нийт бичээд эхэлж. Сонгуулийн хар машиныг хакердах боломжгүй гэдгийг хуульчид яриад байгаа.

АН-аас сонгуулийн тогтолцоог буруутгаж, төрийн эрхийг хууль бусаар авсан гэдэг ойлголтыг нийгэмд төрүүлэх үүднээс нэгэн залууг ашиглаж байна гэж байна.

Компьютер, графикч мэргэжилтэй н.Ган-Очир гэх залуу гэнэт гарч ирэн “Миний бие Монгол Улсын төрийн эрх мэдлийг хууль бусаар авсан гэмт хэргийн гэрч, хохирогч болсон. Энэ хэрэгт миний бие болон Монгол Улсын Ерөнхийлөгчийн зөвлөх, МАН-ын нэр бүхий удирдах албан тушаалтнуудын хамт цагдаа, тагнуулын байгууллагаар зургаан сар шалгуулсан” гэж мэдээлсэн. н.Ган-Очир нь залилангийн хэрэгт удаа дараа холбогдож байсан гэнэ.

Ямартай ч АН-ынхан сонгуулийн сурталчилгаа эхлэхээс өмнө залилангийн хэрэг хийдгээрээ алдартай нэгэн залууг олон нийтийн өмнө гаргаж ирж улс төрийн хар тоглоомоо эхлүүлж байгаа бололтой.

Б.САРУУЛ