Сүүлийн үед явган зорчигчид гарцан дээр машинд мөргүүлж гэмтэх, амь насаа алдах тохиолдол маш их гарч байна. Тиймээс явган зорчигчийн аюулгүй байдлыг хангах үүднээс нийслэлийн 3, 40, 46, 141-р сургууль орчмын авто замын явган гарцад хяналтын камер байршуулжээ.

Тодруулбал, нийслэлийн 13-р сургуулийн арын замд авто машины улсын дугаар илрүүлэгчтэй хяналтын камеруудыг шинээр суурилуулсан байа. Энэ нь өдөр болон шөнийн цагт авто машины улсын дугаарыг тод харуулах тул зам тээврийн осол гаргасан болон дүрэм зөрчсөн жолооч нарыг илрүүлж, холбогдох хуулийн дагуу хариуцлага тооцоход чухал ач холбогдолтой юм. 

ТЦА-ны Урьдчилан сэргийлэх хэлтсийн ахлах мэргэжилтэн, цагдаагийн ахмад Г.Отгонтамир "Зам тээврийн хэрэг ослын улмаас 2020 онд 2,718 хүн хүнд, хөнгөн хэлбэрээр гэмтэж бэртсэн. 1,000 гаруй нь явган зорчигч байна.

Тэр дундаа явган зорчигч зам хөндлөн гарч яваад гарцан дээр машинд мөргүүлж, гэмтэж бэртэх, амь насаа алдах тохиолдол их. Мөн явган зорчигчийг мөргөөд, ослын газрыг орхиж явах ухамсаргүй үйлдэл ч нэлээд гардаг. Харин улсын дугаар илрүүлэгчтэй камер нь осол гаргасан жолоочийг олоход чухал үүрэг гүйцэтгэнэ. 

Энэхүү камер нь манай улсад анх удаа ашиглагдаж байгаа бөгөөд эхний ээлжид дөрвөн сургууль харьяа дүүргийнхээ Гэмт хэргээс урьдчилан сэргийлэх ажлыг зохицуулах зөвлөлтэйгөө хамтран суурилуулна. Гарцан дээр хүүхэд мөргөхөд жолооч нь бууж ирээд хохирогчийг аваад явдаг. Хүмүүс ГССҮТ рүү аваад явж байна гэж боддог боловч үнэн хэрэгтээ 2-3 буудлын цаана буулгасан, 5, 10 мянган төгрөг халаасанд нь хийгээд явсан зэрэг харамсалтай тохиолдол бүртгэгдэж байсан. Харин камер суурилуулснаар энэ байдлыг таслан зогсооно" гэсэн юм.