Ардчилалд аюул учирлаа, ардчиллаа аваръя гэж АН-ыхан олон ярьсан. Гэтэл ардчилалд бус АН-д аюулд учраад байгаа нь улс төрийн үйл явдлууд харуулж байна. АН-ын гишүүд өмнөх болон одоогийн Ерөнхийлөгч нарынхаа талд зогсож намаа хоёр хувааж, түүнийгээ Монголын төр рүү чихлээ. Улмаар энэ байдал даамжирвал АН хуваагдах эрсдэлтэй гэж улс төр судлаачид дүгнэж буй.

Ийнхүү Ардчиллыг авчирсан ах нар өөр хоорондоо дайсагналцаж байх үеэр тэдний орыг залгах, тэдний байр суурь, саналыг хуваах санаархлыг далд тээсэн Хөдөлмөрийн Үндэсний нам /ХҮН/ алгуурхан АН-г хэмлэсээр...

Тэр дундаа одоо болох Ерөнхийлөгчийн сонгууль АН, ХҮН-ын нэр дэвшигчдийн хоорондын тулаан болно. Үнэндээ АН-аас нэр дэвшигч С.Эрдэнийг авах саналыг ХҮН-аас нэр дэвшигч Д.Энхбат хуваах биз. Д.Энхбат өөрийгөө “Ардчиллын хүн” гэж тодотгох болсон нь С.Эрдэнэд очих саналыг хуваах зорилготой байж болзошгүй.

2008-2012 онд УИХ-ын гишүүнээр ажиллаж, түүний дараа улс төрөөс холдсон Д.Энхбат гэнэт гарч ирсэн нь нэг учиртай л таарна. Тэр нь АН-ыг улс төрөөс татаж унагах ХҮН орыг нь залгах юм болов уу?

Харин С.Эрдэнэ бол Ардчиллыг цээжээрээ хамгаалагч, Ардчиллын хараацайнуудын нэг. Тэр өнөөдрийг хүртэл АН-ынхаа төлөө, ардчиллынхаа төлөө ажиллаж байгаа. Гэхдээ түүнийг аль эртнээс Ц.Элбэгдоржийн гар хөл болсон гэх хардлагууд гарах болсон. Тиймээс С.Эрдэнэ нэр дэвшиж буй нь мөн л сонгогчдын саналыг хуваах башир төлөвлөгөө ч байж мэдэх нигууртай. 

Ерөнхийлөгчийн сонгууль АН болон ХҮН-ын цаашдын хувь тавиланг тодорхойлно. Тус хоёр нам бие биенээ хэмлэж, хэн ч дараагийн улс төрийн хүчин болох бэ гэдгийг шийдэх биз.

Ямартай ч Ардчиллын хараацай, ардчиллыг хамгаалагч С.Эрдэнэ нам дамжигч, урвагч, аймхай гэх хочийг зүүж буй Д.Энхбатад тийм ч амар бууж өгөхгүй биз.

Б.Төр