2020 онд дэлхийн эдийн засаг нийтдээ 8.8 их наяд ам.доллар алдах төлөв байна гэж Азийн хөгжлийн банкны илтгэлд дурдсаныг ТАСС агентлаг дамжуулжээ. “Коронавирусийн халдварын тархалт дэлхийн бараг бүх улсыг хамарснаас энэ онд дэлхийн эдийн засаг 5.8 - 8.8 их наяд ам.доллар алдаж, дэлхийн дотоодын нийт бүтээгдэхүүн 6.4 - 9.7 хувиар унах төлөв байна” гэж энэ баримт бичигт дурджээ. Азийн хөгжлийн банкны шинжээчид коронавирусийн халдвараас болоод улс орнуудад хөл хорио, хязгаарлалтын дэглэмээ сунгаж, хагас жил үргэлжлэх юм бол энэ алдагдал илүү ч байж болохыг үгүйсгээгүй байна. Ийм тохиолдолд хөл хорио хагас жил ч үргэлжилж магадгүй гэжээ. Харин гурван сарын дараа эдийн засгийн идэвхжил сэргээд эхэлбэл алдагдал 5.8 их наяд дээр тогтоно гэсэн байна.
Хөл хорио, хязгаарлалт гурван сар үргэлжилбэл Ази Номхон далайн бүсийн орнуудын нийт алдагдал 1.7 их наяд байх бол хөл хорио хагас жил болох юм бол 2.5 их наядыг алдана гэсэн бол зөвхөн Хятад улсын эдийн засагт 1.1 - 1.6 их наядын алдагдал учирна гэсэн байна. Коронавирусийн халдварын тархалтаас болоод даатгалын компаниуд 203 тэрбум долларын алдагдалд орж байгаа тухай үүний өмнө мэдээлж байсан.