Олимпын аварга Н.Түвшинбаяр МҮОХ-ны Ерөнхийлөгчийн тамгаа эргүүлэн өгчээ.

Түүнийг өнгөрөгч дөрөвдүгээр сард өөрийн бэлтгэл хангагч улсын начин Э.Энхбатын биед хүнд гэмтэл учруулсан хэргээр хорих ангид саатулагдаж байсан ч энэ сарын 21-нд шүүхээс түүний хилээр гарах эрхийг хязгаарлан сулласан юм. Суллагдсаныхаа дараа Н.Түвшинбаяр олон улсын олимпын хороонд үүрэгт ажлаа хийх хүсэлтэй байгаагаа илэрхийлсэн байдаг. Гэвч Олон улсын олимпийн хорооноос МҮОХ-ны Ерөнхийлөгч Н.Түвшинбаярт холбогдох асуудалд ёс зүйн арга хэмжээ авсан эсэх, мөн тодорхой шийдвэр гаргасан эсэх тухай шаардлагыг тус хороонд удаа дараа ирүүлээд байсан юм. 

Улмаар МҮОХ-ны Гүйцэтгэх зөвлөл өнгөрөгч тавдугаар сарын 28-нд хуралдаж, тус холбооны Ерөнхийлөгч Н.Түвшинбаярыг үүрэгт ажлаас нь түр түдгэлзүүлэх шийдвэрийг гаргасан.

Гэвч олимпийн аварга Н.Түвшинбаяр дээрх шийдвэрийг эсэргүүцэж, олимпийн хорооны тамгыг авч зугтаасан, мөн тус хорооны албан ёсны мэйл хаягны нууц үгийг өөрчлөн Олон улсын олимпийн хороо руу дур мэдэн захидал явуулсан тухай мэдээлэл цацагдсан юм.