Сүүлийн өдрүүдэд “Засгийн газар огцорч, шинэ Засгийн газар бүрдэнэ” гэх цуу яриа МАН-ынхан дунд гэлтгүй олон нийтийн дунд дэгдэх болжээ. Тэр бүү хэл сайд нарын нэр ч дуулдаж, Засгийн газрын бүтцэд өөрчлөлт оруулах тухай цуурхал гарсан байна. Ингэхдээ МАХН-ынхан шинэ Засгийн газрын бүрэлдэхүүнд гурван сайд томилно гэх яриа ч олны дунд гарсан.

Угтаа бол Үндсэн хуулийн нэмэлт өөрчлөлтөөр Засгийн газрын тогтвортой ажиллуулахын тулд бүхий л эрх мэдлийг олгосон. Хамгийн гол нь Засгийн газрын байр суурь ганхах болсон нь намын даргатай холбоотой. МАН-ын дүрмээр намын дарга Ерөнхий сайд учиртай. Тэгэхээр Ерөнхийлөгчийн сонгууль сая дуусангуут МАН-ын дарга хэн болох вэ гэдэг яриа яригдана.

МАН-ын дарга У.Хүрэлсүх Монгол Улсын Ерөнхийлөгчөөр томилогдохоор болж байгаатай холбоотойгоор МАН-ын даргад Л.Оюун-Эрдэнэ, Д.Амарбаясгалан гэх залуучуудын нэр дуулдаад багагүй хугацаа өнгөрсөн.

Ингээд эрх баригч намын даргын асуудлаас үүдэж Засгийн газрын хувь заяа яригдах болсон бөгөөд энэ ярианаас харахад Л.Оюун-Эрдэнийн тэргүүлсэн Засгийн газар хамгийн богино настай байж ч  мэдэх нь.