Монгол Улсын Ерөнхийлөгчийн сонгуулийн санал хураалт өчигдөр амжилттай болж, өндөрлөлөө. Мөн өнөөдөр улсын хэмжээгээр гар тооллого буюу хяналтын тооллого хийж дууслаа. Урьдчилсан байдлаар МАН-аас нэр дэвшигч У.Хүрэлсүх ялалт байгуулсан талаар Сонгуулийн ерөнхий хорооноос мэдээллээ. 

Сонгуулийн ерөнхий хорооны дарга П.Дэлгэрнаран "Монгол Улсын Ерөнхийлөгчийн ээлжит сонгууль болж өндөрлөлөө. Хуульд зааснаар автоматжуулсан системээс гадна гар аргаар тооллоо. Бүх хэсгийн хороодод гар болон хяналтын тооллогыг 100 хувь хийж дуусгалаа. Урьдчилсан байдлаар дүн мэдээгээ танилцуулж байна. Улсын хэмжээнд нийт 2049379 сонгогч бүртгэгдсэн. Үүнээс түр хассан нь 110 гаруй мянган сонгогч бий. Эндээ 1429 сонгогч эх орондоо ирсэн тул түр хасав гэдгээ сэргээлгэж, саналаа өглөө. Ирцэд бүртгэгдсэн 1216246 сонгогч саналаа өглөө. Ирц улсын хэмжээнд 59.35 хувийн ирцтэй явагдлаа" гэлээ. 

Нийт сонгогчийн  67.76 хувийн буюу 823326 сонгогчийн саналыг МАН-аас нэр дэвшсэн У.Хүрэлсүх авсан байна. АН-аас нэр дэвшсэн С.Эрдэнэ 72832 сонгогчийн саналыг авч 5,99 хувийн дэмжлэг авсан. ХҮН-аас нэр дэвшсэн Д.Энхбат 246968 сонгогчийн саналыг авч 20.33 хувийн дэмжлэг авсан байна.

Мөн 71937 сонгогч буюу 5.92 хувь нь цагаан сонголтыг хийсэн байна.