Бразилын Ерөнхийлөгч Жайр Болсонаро Сан-Паулугийн мотораллид оролцох үеэрээ амны хаалтгүйн улмаас 110 ам доллараар торгуулжээ. Тодруулбал, Сан-Паулу мужийн захиргаа 2020 оны тавдугаар сараас хойш мөрдөгдөж байгаа журмын дагуу олон нийтийн газарт амны хаалт зайлшгүй зүүх ёстой бөгөөд уг журмыг зөрчсөн Ерөнхийлөгч Ж.Болсонарог ийн торгосон байна. 

Тэгвэл манай улсын Ерөнхийлөгч Х.Баттулга өнгөрөгч тавдугаар сарын 20-оос хойш өнөөдрийг хүртэл өдөр бүр төрийн шагнал олгож байна. Ингэснээр Сүхбаатарын талбай, Төрийн ордон иргэдийн хөлд дарагдсан бөгөөд шагнал авагсдын ар гэрийхэн хэдэн зуу, мянгаараа холхилдож байна. Ерөнхийлөгч шагнал гардуулахдаа амны хаалт зүүхгүй, шагнал авч буй иргэд ч амны хаалт зүүхгүй байгаа нь хорио цээрийн дэглэм алдаглаж, улмаар цар тахлын халдвар тараах нөхцлийг бий болгож байна. Сүүлийн 7 хоногт ковид 19-ын халдвар авсан хүмүүс болон нас барсан иргэдийн дийлэнх нь 5-р сарын сүүл болон энэ сарын эхээр халдвар авсан иргэд байгаа юм. Энэ талаарх мэдлээллийг ЭМЯ-ны өдөр бүр мэдээлж байгаа билээ. Өөрөөр хэлбэл Ерөнхийлөгч Х.Баттулгын шагналын хур нь улс даяар цар тахлын нөхцөл байдал хүндрэхэд хүргэсэн байж болзошгүй юм. 

Төрийн тэргүүн бол ард түмэндээ үлгэр дуурайлал үзүүлдэг удирдагч хүн. Тийм ч учраас дэлхийн бусад улсын төрийн тэргүүнүүд иргэд, олон нийттэйгээ адилаар хөл хорио, цар тахлын халдвар хамгааллын дэглэм сахиж байгаа. Улмаар дэглэм зөрчсөн Ерөнхийлөгч торгуулж байхад санаатайгаар олон нийтийг нэг дор цуглуулж, олон хоног дараалан шагнал гардуулж, халдвар хамгааллын дэглэм зөрчиж буй Ерөнхийлөгч ч бас байна.