Цахим орчинд өнгөрсөн долоо хоногт Сүхбаатарын талбайд зохион байгуулагдсан "Номын баяр"-ын арга хэмжээний үеэр цагдаагийн алба хаагч нэгэн иргэнд хүч хэрэглэж байгаа зураг тархаж олон нийтийн эгдүүцлийг хүргээд байсан билээ. Тиймээс бид тус хэргийн талаар ЦЕГ-ын ХМТ-өөс тодруулсан юм. 

ЦЕГ-ын Хэвлэл, мэдээллийн төвийн ахлах мэргэжилтэн, цагдаагийн хошууч О.Эрдэнэхишиг: "Сүхбаатар дүүргийн 6 дугаар хороо, Сүхбаатарын талбай дээр зохион байгуулагдсан “Номын баяр”-ын арга хэмжээний үеэр зохих зөвшөөрөлгүй ном худалдаалж байсан гэх иргэнд зохион байгуулагчдын зүгээс хууль ёсны шаардлага тавихад биелүүлэхээс татгалзаж олон нийтийн газар бусдыг үл хүндэтгэж маргаан үүсгэж байна гэх дуудлага мэдээллийг 2021 оны 06 дугаар сарын 13-ны өдөр 18.00 цагт тус дүүрэг дэх цагдаагийн нэгдүгээр хэлтэст ирүүлсэн.

Сүхбаатарын талбай орчимд эргүүлийн үүрэг гүйцэтгэж байсан цагдаагийн алба хаагчид дуудлагын дагуу очиж шалгахад 58 настай, эрэгтэй Т гэгч нь зохион байгуулагчдын тавьсан шаардлагыг биелүүлэхээс татгалзаж маргаан үүсгэн газар сууж байсан тул цагдаагийн алба хаагчид гудамж талбай олон нийтийн газар иргэдийн амар тайван байдлыг алдагдуулахаас урьдчилан сэргийлж уг иргэнийг тухайн газраас холдуулсан байна" гэсэн юм.

Харин "Номын баяр 2021"-ыг зохион байгуулагчдын зүгээс "Тус арга хэмжээнд оролцож байгаа хүн бүр зөвшөөрөл авахаас гадна вакцины хоёр тунд хамрагдсан байх шаардлагатай. Тухайн иргэн согтууруулах ундааны зүйл хэрэглэсэн байснаас гадна вакцины гэрчилгээ болон зөвшөөрөл аваагүй байсан. Бид тухай хүнд хууль ёсны шаардлага тавьсан боловч клубын охидод ёс бус үг хэлж, цагдаагийн алба хаагчийн биед халдсан" гэлээ. 

Энэ талаар ЦЕГ-ын хэвлэл мэдээллийн төвөөс тодруулахад "Тухайн иргэн согтууруулах ундааны зүйл хэрэглэсэн нь тогтоогдоогүй. Харин орилж хашхирч байсан гэх мэдээлэл бий" гэсэн юм.