Өчигдөр (2021.06.14) ТЦА-нд нийслэлд явган зорчигчийг мөргөж гэмтээсэн 3 тохиолдол бүртгэгджээ. Шалгалтын явцад дээрх иргэд бүгд согтууруулах ундааны зүйл хэтрүүлэн хэрэглэсэн үедээ гарцгүй замаар гарч улмаар машинд мөргүүлсэн болох нь тогтоогдсон байна.
Тодруулбал,
- 2021.06.14-ний өдөр 23 цагийн орчим Чингэлтэй дүүргийн нутаг дэвсгэр их тойруугийн гудамж, Засгийн газрын авто баазын хойд замд суудлын автомашинд явган зорчигч мөргөгдсөн. Явган зорчигч согтууруулах ундааны зүйл хэрэглэсэн, явган хүний гарцгүй хэсгээр зам гарч байсан байна.
- 2021.06.14-ний өдөр 22 цагийн орчим Чингэлтэй дүүргийн нутаг дэвсгэр, их тойруугийн гудамж Баруун 4 замын хойд уулзварт суудлын автомашинд явган зорчигч мөргөгдсөн. Явган зорчигч согтууруулах ундааны зүйл хэрэглэсэн, явган хүний гарцгүй хэсгээр зам гарч байсан байна.
- 2021.06.14-ний өдөр 01 цагийн орчим Сонгинохайрхан дүүргийн нутаг дэвсгэр, Энхтайваны өргөн чөлөө, 5 шарын автобусны буудлын урд замд суудлын автомашинд явган зорчигч мөргөгдсөн. Явган зорчигч согтууруулах ундааны зүйл хэрэглэсэн байсан.
Замын хөдөлгөөний дүрэмд явган зорчигч автозамыг гарц гарамгүй хэсгээр гарах болон ойртон ирж байгаа тээврийн хэрэгслийн урдуур гэнэт гүйхийг хориглосон байдаг. Гэтэл согтууруулах ундааны зүйл хэрэглэсэн үедээ гэлтгүй тавхан алхмын газрыг товчлох болон гэрлэн дохио асахыг хүлээхгүйгээр гарцгүй газраар зам хөндлөн гарч, амь нас эрүүл мэндээ эрсдэлд оруулсаар байна.
Тиймээс иргэд та бүхэн явган зорчигч хэлбэрээр хөдөлгөөнд оролцохдоо өөрийн аюулгүй байдлыг хангаж, замын хөдөлгөөний дүрмээ чанд баримтлан хөдөлгөөнд оролцохыг ТЭЭВРИЙН ЦАГДААГИЙН АЛБАНААС анхааруулж байна.