Баасан гарагийн УИХ-ын чуулганы хуралдаан эхэлж "Соёлын тухай хууль"-ийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж байна. Уг хуулийн төслийг УИХ-ын гишүүн Г.Мөнхцэцэг танилцуулсан бөгөөд тэрээр "Соёлын үйл ажиллагаа эрхлэх, уг үйл ажиллагаа нь бүх нийтийн оролцоо үйл хэрэгт тулгуурласан байхаар хуульд тусгалаа. Түүнчлэн дараах зохицуулалтуудыг хуульд нэмсэн.

УИХ-ын гишүүн Б.Бат-Эрдэнэ: Та бүхэн монголчуудын бүтээсэн өв соёлын талаар ямар ойлголттой байдаг вэ? Бидний бүтээсэн агуу өв соёл бол дуу, яруу найраг, бүжиг, монгол бөх, морь, сур зэрэг уламжлалт соёлоо хүний  дотоод сэтгэл оюунтай нь барилдуулснаараа л онцлог юм. Энэ тал дээрээ онцгой анхаарч, хуульдаа шигтгэж өгөхгүй бол болохгүй. Сүүлийн 30 жилд бид гаднын орнуудын гоё сайхныг хөөцөлдөж явсаар байгаад үндэсний соёлынхоо үнэ цэнэтэй зүйлсийг алдаж дуусаж байна. Монгол бөхөөс эхлээд морь, сур маань ад үзэгдэх байдалтай боллоо. Энэ нь өв соёлыг тээгч, уламжлуулагчдын хариуцлагатай холбоотойгоор үндсэн үзэл, философийг нь алдагдуулсантай л холбоотой шүү дээ. 

Соёлын сайд Ч.Номин, Нүүдлийн соёл иргэншлийг түгээн дэлгэрүүлж танин мэдүүлэх үүрэгтэй хууль. Энэ хүрээнд төрөөс тусгайлан дэмжлэг үзүүлэх салбаруудыг хуулийн төсөлд тусгасан байгаа. 

Ж.Батсуурь: Соёлын өвийг хамгаалах бүртгэхэд эдийн засгийн дэмжлэг хэрэгтэй. Энэ хуульд эдийн засгийн баталгааг хангасан заалт орж байна уу. Энэ талын зохицуулалтгүй бол лоозонгийн шинжтэй хууль болно шүү.

Соёлын сайд Ч.Номин, Соёл бол хэрэглээнд орж байж хөгждөг. Энэ утгаараа эдийн засгийн талын заалтууд орсон. Ялангуяа соёлын бүтээлч үйлдвэрлэлийг төрөөс дэмжих чиглэлийн заалтуудыг оруулсан. Соёлын салбар орхигдсон байсан учир сүүлийн дөрвөн сард соёлын салбарынхаа суурь судалгааг хийж, цаашид бодлогоор дэмжиж ажиллах хүрээгээ тодорхойлж, 12 чиглэлийг онцгойлон авч үзэхээр шийдвэрлэсэн. 

Б.Баттөмөр: Монгол Улсын хөгжлийн олон гарцуудын нэг Монголын соёл, уламжлал, зан заншлаа хадгалж, хамгаалж, хөгжүүлэх асуудал юм. Энэ бол улс орон оршин тогтнох чухал дархлаа юм. Соёл урлагийн байгууллагыг хөгжүүлэхэд санхүүжилтийг ямар хэлбэрүүд байж болох вэ? Соёл урлагийн салбарын ажилтнуудын хөдөлмөрийг бодитой үнэлэх чиглэлд ямар шинэ зүйл заалт оруулж байна вэ? Залуучууд гадны янз бүрийн урсгал чиглэлд залуучууд татагдах хандлагатай байдаг. Энэ талаар ямар бодлого барих вэ? Урлагийн шилдэг бүтээлийг улсын сан хөмрөгт худалдаж авах ажил ямар түвшинд явагдаж байна вэ?

Г.Мөнхцэцэг: Энэ  хуулиар соёлын байгууллагуудын ажилчдын ахуй хангамж, тэтгэвэр тэтгэмжээс эхлээд нэлээд олон асуудал шийдэгдсэн. Төвөөс алслагдсан соёлын байгууллагуудын ажилтнуудад таван жилд нэг удаа тэтгэлэг олгох заалт оруулсан. 

Соёлын дэд сайд Батбаяр: Гаднын соёлын нөлөөлөлд манай хүүхэд залуу үе татагдах байдал газар авч байна. Тиймээс соёлын өвийг төрийн онцгой анхааралд байлгаж, хүүхэд залуус соёлын өв, үнэт зүйлээ судлах, өвлөх уламжлуулах нөхцөлийг бүрдүүлэх замаар соёлын дархлаа бүхий монгол хүнийг төлөвшүүлэх бодлого барьж ажиллана. Нөгөө талаас хүн төрөлхтөний болон үндэсний соёл иргэншлийн ололт, соёлын үйл ажиллагааны үр шимийг хүртэх, авьяас чадвараа нээн хөгжүүлэх нөхцөл бололцоог бүрдүүлэх чиглэлийн заалтууд төсөлд орсон байгаа.