Цахим орчинд нэгэн жолооч Таван богд ХХК-ны түгээлтийн машины хаалгыг нээн доторх зорчигтой зодолдож байгаа бичлэг тархаад байгаа билээ.  Тодруулбал, Алтай хотхоны урд байрлах замын голд 19-65 ОРО улсын дугаартай “Приус-30” маркийн автомашины жолооч замын голд хүргэлтийн машины жолоочийг зодож, хувцсыг нь урсан юм.

Бид энэ талаар ЦЕГ-н ХМТ-өөс тодруулахад: Өнгөрөгч мягмар гаригт буюу зургаадугаар сарын 15-ны 18:00 цагийн орчимд Таван богд ХХК-ны борлуулалтын ажилтан Ц, жолооч Б нар нь ХУД-ийн гуравдугаар хорооны нутаг дэвсгэрт зам тээврийн хөдөлгөөнд оролцох үед 19-65 ОРО улсын дугаартай приус 30 машины эзэмшигч 31 настай эрэгтэй С нь машинаараа ус цацсан, шахсан гэх шалтгаанаар жолоочтой маргалдсан хэрэг гарсан байна.

Улмаар түгээгчийн сууж явсан хаалгыг хаахдаа гарыг нь хавчсаны улмаас иргэн С нь түгээгчийн биед халдсан асуудал болсон байна. Тус хэргийг Хан-Уул дүүрэг дэх цагдаагийн газрын нэгдүгээр хэлтэст материалжуулан холбогдох шалгалтын ажиллагааг явуулж байна" гэлээ. 

Харин 19-65 ОРО улсын дугаартай “Приус-30” автомашины жолооч С нь “Ямар шалтгааны улмаас хүн зодсоноо хэлэхгүй. Бичлэг хийхээс өмнө юу болсныг хүмүүс мэдэхгүй байж ингэж болохгүй. Бичлэг хийсэн хүн болсон явдлыг эхнээс нь бичсэн бол бүх зүйл тодорхой харагдана. Өөр мэдээлэл өгөхгүй” гэсэн тайлбарыг нэгэн хэвлэлд өгчээ.