Хэдхэн хоногийн өмнө буюу энэ сарын  13-ны оройн 23:00 цагийн үед Сүхбаатар дүүргийн нутаг дэвсгэрт нэгэн Хятад рестораны өмнө үл таних иргэн архидан согтуурсан үедээ бусадтай маргаж, автомашинаасаа галт зэвсэг гарган иргэдийг айлган сүрдүүлсэн хэрэг гарсан билээ.

Тэгвэл үрлэн сумтай буугаар бусдыг айлган сүрдүүлсэн хэрэг дахин гарсан байна. Тодруулбал, зургаадугаар сарын 17-ны өдрийн 20 цагийн орчимд Баянзүрх дүүргийн 14-р хороо, “Нарантуул захын хойд талын замаар зорчих үедээ  “Toyota Vanguard”  болон  “Toyota crown” маркын автомашины  жолооч иргэн Б, Т нар эгнээ байр буруу эзэлсэн гэх шалтгаанаар маргалджээ. Улмаар 33 настай  иргэн Б нь 26 настай иргэн Т-ийн биед халдаж, металл  үрлэн  сумтай  гар  буугаар толгойн  тус  газарт  нь  тулган  айлган сүрдүүлээд зугтсан байна.

Хэргийг Баянзүрх дүүргийн цагдаагийн нэгдүгээр хэлтэст шалгаж байгаа юм байна. 

Монгол Улсын Галт зэвсгийн тухай хуульд галт зэвсгийг иргэний, харуул хамгаалалтын, хууль сахиулахын, байлдааны гэсэн дөрвөн төрөлд хуваадаг. Ан агнах, буудлагын спорт-сургалтаар хичээллэх, үзмэр, цуглуулгын зорилгоор Монгол Улсын иргэний өмчилж, эзэмшиж байгаа галт зэвсгийг иргэний зориулалттай галт зэвсэг гэнэ.

Хуульд өөрөөр заагаагүй бол хуулийн этгээд зөвхөн үзмэр, цуглуулгын болон спорт-сургалтын үйл ажиллагаа эрхлэх зорилгоор иргэний зориулалттай галт зэвсэг өмчилж болно гэж заасан байдаг.