Дэлхий нийтийг айдаст автуулаад байгаа коронавирусний халдвар манай улсад эрчимтэй тархаж байгаа билээ. 

Үүнтэй зэрэгцэн эмнэлэгүүд ПСР шинжилгээг төлбөртэй авч эхэлсэн бөгөөд ачаалаа дийлэхгүй зарим нь цаг дууссан гэсэн хариултыг өгч байгаа юм. Улмаар иргэд түргэвчилсэн тестийг ихээр авч энэ төрлийн бизнес хөгжиж байгаа гэхэд хилсдэхгүй. Тэгвэл тус арга бас тийм ч найдвартай биш гэдэг нь ар араасаа буруу хариу гаргаж байна гэх хүмүүсийн пост, сэтгэгдлүүдээс харагдаж эхэллээ. 

Зөвхөн энэ ч бус коронавирусний халдвар авсан иргэд болон хамааралтай зөвлөгөө авах хэд хэдэн группт яагаад өөр өөр гараад байгааг гайхсан иргэдийн сэтгэгдлүүд олон байгаа юм. 

Тэгвэл ЭМЯ-аас түргэвчилсэн тестийн талаар ийн тайлбарлажээ. 

Тодруулбал, Түргэвчилсэн буюу антиген тодорхойлох шинжилгээ нь хамар залгиурын арчдаснаас вирусийн гадаргуугын уургийг илрүүлэх шинжилгээ юм. Халдварын эрт үеийн илрүүлэгт тохиромжгүй бөгөөд харьцангуй мэдрэг чанар багатай арга юм. Хариу нь 1-2 цагийн дотор гарна.

Мөн "Энэхүү шинжилгээг КОВИД-19 вирусийн шинж тэмдэг илэрсэн хүн өгвөл илүү зохимжтой бөгөөд xариу гарах хугацаа богино байдаг давуу талтай. Шинжилгээний аргын мэдрэг чанараас шалтгаалж халдварын эрт үе буюу вирус цөөн байх үед хуурамч сөрөг хариу гарах боломжтой" хэмээн бичжээ.

Тиймээс иргэд та бүхэн түргэвчилсэн тестэд итгэхээс илүүтэйгээр халдвар хамгааллын дэглэмээ сахин шаардлагатай тохиолдолд ПСР шинжилгээ авч байгаа эмнэлэгүүдэд цаг авч шинжилгээгээ өгөхийг зөвлөж байна. 

эх сурвалж: intermed.mn