Сангийн яамны харьяа, “Үнэт цаасны төвлөрсөн хадгаламжийн төв” ХХК-ийн гүйцэтгэх захирлаар ажиллаж байсан Ж.Байгальмааг гэмт хэрэг зохион байгуулж, хамтран оролцсон гэх Эрүүгийн хуулийн 3.1, 3.3-т заасан хэрэгт холбогдон шалгагдаж байгаа талаар заррм хэвлэл мэдээллийн хэрэгслүүд мэдээлж эхэлжээ.

Тодруулбал, тэрбээр “Үнэт цаасны төвлөрсөн хадгаламжийн төв” ХХК-ийн гүйцэтгэх захирлаар ажиллаж байхдаа тус газрын төлөөлөн удирдах зөвлөлийн гишүүн П.Г, худалдан авах ажиллагаа хариуцсан мэргэжилтэн Б.Г, ерөнхий нягтлан бодогч А.С нартай бүлэглэн байгууллагын 2018 оны төлөвлөгөөнд тусгагдсан албан ажлын хэрэгцээнд ашиглагдах 13 ширхэг компьютерыг худалдан авах үйл ажиллагааг хууль бусаар зохион байгуулж, гэмт хэрэг үйлдэхийг санаачлан, удирдан төлөвлөж, хамтран гүйцэтгэсэн гэж хэрэгт холбогдож, прокурор тэдэнд яллах дүгнэлт үйлдсэн аж. 

Яллах дүгнэлтэд дурдсанаар тэд “Саммит компьютер технологи” ХХК-иас дээрх 13 ширхэг компьютерыг худалдан авах ёстой байжээ. Гэтэл шалгаруулсан байхад үнийн саналыг хугацаа хоцруулж ирүүлсэн, шалгаруулалтад оролцоогүй, шалгаруулалтын шаардлага хангаагүй, тус хязгаарлагдмал хариуцлагатай компанийн төлөөлөн удирдах зөвлөлийн гишүүн П.Гийн эзэмшлийн компани болох “Титан софтвейр” ХХК-ийг хууль бусаар шалгаруулсан баримт бүрдүүлсэн бөгөөд улмаар 2018 оны арвадугаар сарын 26-ны өдөр 25.350.000 төгрөгийн санхүүжилтийг “Титан софтвейр” ХХК-д олгуулж бусдад давуу байдал бий болгосон байна. 

Тэгвэл прокурор яллах дүгнэлт үйлдэж, шүүхэд шилжүүлсэн уг хэргийн анхан болон давж заалдах шатны шүүх хурал болж, хэргийг дахин шалгуулахаар прокурорт буцаагаад байна. Прокурорын хувьд дахин шалгах зүйл байхгүй, нотлогдсон хэрэг гэж эсэргүүцэл бичсэн боловч шүүх түүнийг нь хүлээж аваагүй аж.