Цар тахлын энэ үед УОК, НОК хоёр бол адилхан л ачаалалтай ажиллаж байх учиртай. Гэтэл Нийслэлийн онцгой комисс Улсын комисстой хамтран ажиллахгүй байсаар өдийг хүрлээ. УОК нэг шийдвэр гаргахад НОК шийдвэрийг сөрдөг, эсвэл өөрчилдөг үзэгдэл ард иргэдийг төөрөгдүүлсээр...
Ерөнхийдөө комисс гэж том ярихаас илүүтэй НОК-ийн дарга, Хотын захирагч Д.Сумъяабазар Засгийн газар, УОК-той хамтарч ажиллахгүй байна гэх шүүмжлэл гарч байгаа. “COVID-19”-өөр хамгийн анхны хариуцлагыг хүлээж У.Хүрэлсүхийн Засгийн газар огцорсон. Тухайн үед УОК-ын дарга Я.Содбаатар, НОК-ын дарга Д.Сумъяабазар нарыг огцрохыг шаардаж байсан ч Д.Сумъяабазар "харъяа албаны дарга нарыг чөлөөлөөд өөрөө хариуцлагаас мултарсан" удаатай.
Нийслэл бол өөрөө том айл. Тийм болохоор нийслэлийн оролцоогүйгээр УОК-ын ажил явахгүй. Өөрөөр хэлбэл Улаанбаатар хотод цар тахал газар авсан энэ үед Хотын дарга Засгийн газар, УОЗ-той нягт хамтарч ажиллах учиртай.
Хэдэн сарын өмнө Ерөнхий сайд Л.Оюун-Эрдэнэ Нийслэлийн онцгой комиссын үйл ажиллагаатай танилцахаар очиход нь Хотын дарга Д.Сумъяабазар байгаагүй. Үүнд нь Ерөнхий сайд ихэд бухимдаж, улсын ерөнхий сайд ирж байхад НОК ингээд байж болохгүй. Нийслэлийн онцгой комиссыг цэгцлэх цаг болж гэж хэлээд гараад явсан. Ерөнхий сайд Л.Оюун-Эрдэний тэр үеийн бухимдал одоог хүртэл тайлагдаагүй бөгөөд тэр цагаас хойш хамтарч ажиллах ёстой хотын дарга Д.Сумъяабазар нь Ерөнхий сайд, Шадар сайдтай уулзалдахгүй байгаа сурагтай.
Улмаар Ерөнхий сайд хотын даргад хариуцлага тооцох асуудлыг ярина гэсэн мэдээллүүд хэвлэлээр цацагдах болсон. Ер нь хотын дарга Д.Сумъяабазар хариуцлага хүлээж ажлаа өгөх болзлоо олон удаагийн увайгүй үйдлээрээ, хариуцлаггүй шийдвэрүүдээрээ хангачихсан. Зүй ёсоороо бол У.Хүрэлсүхийн Засгийн Газар биш Хотын дарга түрүүлж огцрох байсан гэдгийг өчнөөн олон хүн хэлж сануулаад байгаа.