Урт цагаан төвд түрээсийн үйл ажиллагаа явуулж байгаа 200 гаруй түрээслэгчид байгаа юм. Эдгээр түрээслэгчид зохион байгуулалтанд орж үйлдвэрчний түр хороо байгуулан ажиллаж байгаа аж. Түр хороо бүх түрээслэгчдийг бүртгэлжүүлж албажуулсан байна. Ингээд түр хорооноос нийслэлийн өмчийн ашиглалт, удирдлагын газартай хамтарч ажиллахаар болж өнөөдөр хамтран ажиллах санамж бичигт гарын үсэг зурж баталгаажууллаа. Нийслэлийн өмчийн ашиглалт, удирдлагын газрын дарга Ш.Үнэнбатын ярьж байгаагаар төр хэлсэн ярьснаа хэрэгжүүлж түрээслэгчдийг ажлын байраар хангаад эхэлсэн бөгөөд цаашид урт цагаан шинэчлэгдэн баригдтал бүх түрээслэгчдийг түр ажлын байраар хангах юм байна.Харин урт цагаан баригдсан хойно түрээслэгчдийг эргүүлэн оруулна гэлээ. Мөн эхний ээлжинд нийслэлийн засаг захиргааны 4-р байранд 280м2 талбайг тохижуулжээ. Дээрхи талбайг иргэдэд түрээслэхдээ урт цагаан төвд түрээслэж байгаа үнээс хямд үнээр түрээслэхээс гадна хэн нэгэн зуучлагчгүй шууд түрээслэгчтэй нь гэрээлэх юм байна. Гэрээ байгуулсан түрээслэгчдийн хувьд харж хандаж байгаад баярлаж байгаагаа нийслэлийн удирдлагуудад уламжилж байсан юм. Мөн хэдхэн түрээслэгч нэртэй давхар түрээслэгчид хэл ам гаргаж байгааг ярьж байлаа. Төрөөс урт цагаан төвийг яаралтай газарт оруулж шинэчлэн барихгүй бол ашиглалтын шаардлага хангахгүй, нурж болзошгүй байдалтай байгаа юм.