Цахим орчинд нэхмэлчин тамирчин болох Их Британийн усанд үсрэлтийн тамирчин Том Дэйли олны анхаарлыг ихээр татаад байна. Ням гарагт зохион байгуулагдсан эмэгтэйчүүдийн усанд шумбалтын тэмцээнийг үзэж сонирхох үеэр Том Дейлигийн малгай нэхэж байгаа дүр зураг камерын дуранд өртсөн нь энэ юм. 

Тэрээр ямар ч тэмцээний үеэр гар урлалын багаж хэрэгслүүдээ авч явдаг бөгөөд хоббигоо хөгжүүлэхийн тулд Инстаграмд "Madewithlovebytomdaley" гэсэн хаяг нээж, гар урлалын бүтээлүүдээсээ олон нийттэй хуваалцдаг аж. Мөн тэрээр өөрийн бүтээлүүдээ худалдаж "Тархины хавдар" буяны байгууллагад 5787 фунт стерлинг хандивлаж байжээ.

Сонирхуулахад, Их Британийн усанд үсрэлтийн тамирчин Том Дэйли энэ жил дөрөв дэх олимпдоо оролцож байгаа бөгөөд 10 метрийн синхрон үсрэлтийн төрөлд хамтрагч Мэти Лигийн хамтаар анхны алтан медалиа хүртсэн юм.

Том Дэйли 2011 онд нуруундаа маш хүнд бэртэл авч, спортоо орхих шахсан ч тамирчин хүний тэвчээр хатуужлаар их спортдоо эргэн ирж, олимпын аварга болж чаджээ. Тэрээр өмнө нь олимпын ганцаарчилсан төрөлд 2008 онд 7-р байр, 2012 онд хүрэл медаль , 2016 онд 18-р байр хүртэж байсан бол синхронд 2008 онд 8-р байр, 2012 онд 4-р байр, 2016 онд хүрэл медаль хүртэж байсан юм.

Мөн тэрээр бэлгийн цөөнхүүдийн нэг. Тэрээр 2017 онд кино продюсер Дастин Ланс Блэктэй гэрлэсэн бөгөд одоо Робби хүүгийн хамт гурвуулаа амьдардаг. Түүнийг ялалт байгуулсны дараа Хятадын сэтгүүлч Дейлигээс гэр бүлийнх нь талаар асуухад “Энэ удаагийн олимп бол миний хувьд хамгийн гайхалтай, амьдралыг минь өөрчилсөн том аялал байлаа. Одоо нөхөр, хүү хоёр дээрээ очиж чанга тэврээд, ялалтын баяраа тэмдэглэхийг тэсэн ядан хүлээж байна. Тэднийгээ маш их санаж байна” хэмээн баяртайгаар хэлжээ.

Мөн “Би өөрийгөө ижил хүйстэн, олимпын аварга гэдгээ хэлэхдээ үнэхээр бахархалтай байна. Миний олимпын аварга болоод зогсож байгаа нь хүн хүсвэл юунд ч хүрч болохыг харуулж байгаа хэрэг” хэмээжээ. 

эх сурвалж: bbc.com, NHK, reuters