Уулзалтаар БНСУ-ын “К2ЛБИО” байгууллагын захирал, доктор Ли Кён Мин Шадар сайдад Короновируст халдвар /КОВИД19/-ыг илрүүлэх бичил лабораторийг Монгол улсад байгуулах саналыг танилцууллаа. Тус лабораторийн хувьд ПГУ-ын түвшинд дүйцэх шинжилгээг хийх хүчин чадалтай бөгөөд шинжилгээний сорьцыг тусгай лабораторид хүргэж унших шаардлагагүй, сорьцод шууд шинжилгээ хийдэг, бага орон зай эзлэн ажилладаг, 15 минутаас 1 цагийн хугацаанд 340 сорьцийг шинжлэн хариу гаргах чадвартай, вирусын мутаци болох альфа, дельта бусад хувилбарыг ялган таних боломжтой зэрэг олон давуу талуутайг онцоллоо.

 

Энэхүү бичил лаборторийг эхний удаад Чингис хаан ОУ-ын нисэх буудал, Замын-Үүд, Алтанбулаг хийлийн боомт, Баянзүрх, Сонгинохайрхан дүүргийн Эрүүл мэндийн төвүүдэд байршуулан, туршилтын байдлаар зорчигч, иргэдээс шинжилгээ авах, цаашлаад аймгуудад бусад дүүргүүдэд суурьшуулан, нэгдсэн цахим сүлжээгэрэ холбож, мэдээллийг нэгтдсэн сүлжээ үүсгэх, лаборатори дээр ажиллах эмч эмнэлгийн ажилтнуудад сургаж дадлагжуулах боломжтой тухай доктор Ли Кён Мин уламжиллаа.

 

Мөн ковидын халдвараас урьчилсан сэргийлэх, халдвар авсан тохиолдолд вирусыг устгах, өвчлөлийг эдгээх БНСУ-д үйлдвэрлэсэн биологийн идэвхит бүтээгдэхүүний дээжээс монгол улсад хандивлах, цаашид худалдах гэрээ байгуулах саналтай тухай мэдээлэл хүргэлээ.

 

Шадар сайд С.Амарсайхан “БНСУ-ын “К2ЛБИО” байгууллагын захирал, доктор Ли Кён Мин таныг УОК-той хамтран ажиллах гаргасанд талархаж байна. Холбогдох газруудаас зөвшөөрөл олгож, аль болох богино хугацаанд бичил лабораторийг байршуулах, суурилуулах асуудалд бид анхааран ажиллана.

 

Хамгийн гол нь лабораторийн хувьд сорьцод хийх шинжилгээ нь чанар стандартын шаардлага хангасан, дэлхийн болон олон улсын байгууллага хүлээн зөвшөөрсөн байх ёстой гэдгийг бүхэн сайн мэдэж байгаа. Лаборторийн хувьд богино хугацаанд сорьцийг шинжлэх, хариу гаргадаг учраас бид эхний ээлжинд хил гааль, халдварын тархалт эхтэй дүүргүүдэд байршуулна. Гэхдээ тус лабортори сорьцоос ковидыг алдалгүй тогтоож байна уу, мутацийг ямар хэмжээд илрүүлэх вэ гэдгийг та бүхэн манай мэргэжлийн байгууллагуудтай хамтран ажиллаж, туршилт хийж, үр дүнгээ ойрын хугацаанд танилцуулах хэрэгтэй. Хэрэв үнэхээр алдаа мадаггүй ажиллаж байгаа бол бид хамтын ажиллагаагаа эхлүүлж, цаашид дүүргүүд болон аймгуудын Эрүүл мэндийн төвүүдэд суурилуулна. Бичил лаборторийн хувьд бага зардлаар олон сорьцийг маш богино хугацаанд шинжлэх, дээр нь дельта зэрэг мутацийг газар дээр нь тогтоож чадвартайгаараа олон талын давуу талтай гэж харж байна. Та бүхэнд ЭМЯ, ХӨСҮТ, НЭМҮТ, НОК бүх талын дэмжлэг үзүүлэн ажиллана” гэв.

 

БНСУ-ын “К2ЛБИО” байгууллагаас танилцуулсан дээрх лабораторийг манай улс хил гаалийн бүс, нийслэл, аймаг дүүргийн эрүүл мэндийн төвүүдэд суурилуулснаар иргэдээс авах сорьцоос Короновируст халдвар /КОВИД19/-тай эсэхийг 1 цагт багтаан тогтоож, бага зардлаар богино хугацаанд вирусын мутацийг мөн давхар илрүүлэх боломж бүрдэх юм.