Үндэсний статистикийн хорооноос инфляцын үнийн өсөлтийг долдугаар сарын байдлаар танилцууллаа. Инфляц буюу өргөн хэрэглээний бараа бүтээгдэхүүний үнийн өсөлт улсын хэмжээнд 7.4 хувьтай, Улаанбаатар хотод 7.9 хувьтай гарсан байна.

Нийт инфляцын 47.7 хувийг хүнсний бүтээгдэхүүний үнийн өсөлт эзэлж, үүн дотроо хамгийн их нөлөө үзүүлж байгаа нь мах махан бүтээгдэхүүн эзэлж байна. Хэрэглээний бараа, үйлчилгээний үнэ 2021 оны 7 дугаар сард өмнөх сараас 1.3 хувиар өсөхөд хүнсний бараа, ундаа, усны бүлгийн үнэ дүнгээрээ 0.3 хувиар буурсан хэдий ч ( мах, махан бүтээгдэхүүний дэд бүлгийн үнэ 2.2 хувь), согтууруулах ундаа, тамхины бүлгийн үнэ дүнгээрээ 0.6 хувь, эм тариа, эмнэлгийн үйлчилгээний бүлгийн үнэ 0.6 хувь, тээврийн бүлгийн үнэ дүнгээрээ 9.0 хувиар өссөн нь голлон нөлөөлсөн байна. 

Хүнсний барааны бүлгийн үнэ өмнөх оны мөн үеэс 2020 оны 7 дугаар сард 7.1 хувиар, 2021 оны 7 дугаар сард 10.2 хувиар өсөж, өсөлтийн хурдац 3.1 пунктээр, хүнсний бус бараа, үйлчилгээний бүлгийн үнэ 2020 оны 7 дугаар сард 1.8 хувиар, 2021 оны 7 дугаар сард 6.0 хувиар өсөж, өсөлтийн хурдац 4.2 пунктээр нэмэгджээ.

Улаанбаатар хотод хэрэглээний бараа, үйлчилгээний үнэ 2021 оны 7 дугаар сард өмнөх оны мөн үеэс 7.9 хувиар өсөхөд хүнсний бараа, ундаа, усны бүлгийн үнэ 11.0 хувь, согтууруулах ундаа, тамхины бүлгийн үнэ 3.6 хувь, эм тариа, эмнэлгийн үйлчилгээний бүлгийн үнэ 6.5 хувь, орон сууц, ус, цахилгаан, хийн болон бусад түлшний бүлгийн үнэ 5.9 хувь, зочид буудал, нийтийн хоол, дотуур байрны үйлчилгээний үнэ 14.1 хувь, тээврийн бүлгийн үнэ 17.1 хувиар өссөн нь голлон нөлөөлсөн байна.

Улаанбаатар хотод хэрэглээний бараа, үйлчилгээний үнэ 2021 оны 7 дугаар сард өмнөх оны эцсээс 9.9 хувиар өсөхөд хүнсний бараа, ундаа, усны бүлгийн үнэ 16.4 хувь, эм тариа, эмнэлгийн үйлчилгээний бүлгийн үнэ 5.0 хувь, орон сууц, ус, цахилгаан, хийн болон бусад түлшний бүлгийн үнэ 22.5 хувь, тээврийн бүлгийн үнэ 14.3 хувиар өссөн нь голлон нөлөөлжээ.