Хичээлийн шинэ жил эхэлж байгаатай холбоотойгоор УИХ-ын дарга Г.Занданшатар мэндчилгээ дэвшүүллээ. 

Энэ үеэр УИХ-ын дарга Г.Занданшатар " Хүүхдүүдийн үгийг сонсох Мини парламент" ажиллуулахаа мэдэгдсэн юм. 

Тодруулбал, Тэрээр хүүхдүүдэд мэндчилгээ дэвшүүлэхдээ "Хүүхдүүдэд снал бодлоо чөлөөтэй илэрхийлэх, өөрсдийн хүсэл сонирхлоо төр засагтаа хүргэх, эргэн тойрондоо байгаа буруу мууг засаж сайжруулахын төлөө үгээ хэлэх боломжийг бүрдүүлэх нь Улсын Их Хурлын үүрэг гэж бид үзэж байгаа.

Энэ зорилгоор энэ жилээс эхлэн улсын хэмжээнд ПАРЛАМЕНТЫН БОЛОВСРОЛ олгох хөтөлбөр хэрэгжүүлж, зөвхөн хүүхдүүдээс бүрдсэн МИНИ ПАРЛАМЕНТ ажиллуулахаар төлөвлөж байгааг дуулгахад таатай байна. 

Хайрт хүүхдүүд ээ,

Та нар бол Монгол орны маргаашийг бүтээх, эх орноо хөгжил дэвшлийн гэгээн замд хөтлөх эзэд нь билээ.

Та нарын дунд ирээдүйн эрдэмтэн мэргэд, дэлхийн од болсон тамирчид, урлаг соёлын алдартнууд бий. Монголоо мандуулах төр хувийн хэвшлийн зүтгэлтэн, ард түмнийхээ  хүндэтгэлийн хойморт залрах төрийн зүтгэлтнүүд бас байгаа.

Ийм сайхан ирээдүйг тань гэгээн саруул байлгах, сурах – хүмүүжих - хөгжих таатай нөхцөлийг бүрдүүлэх нь бидний үүрэг гэж үзэж, ах эгч нар нь хичээн шамдах болно. 

Эрдмийн их аян тань саад үгүй дардан байж, Монгол эх орон маань бадран мандах болтугай.

Монголынхоо баясгалант ирээдүй багачууддаа, мянга мянган багш сурган хүмүүжүүлэгчдэдээ сурлага, хөдөлмөр, урлаг, спортын бахдам амжилтыг, эрүүл энхийн эсэн жаргалыг хүсэн ерөөе" гэсэн юм.