2021-2022 оны Хичээлийн шинэ жил эхлээд дөрөв хонож байна. Коронавируст цар тахлын улмаас хичээлийг танхим болон цахим гэсэн хосолсон хэлбэрээр явуулах шийдвэрийг Засгийн газар болон ЭМЯ зэрэг холбогдох яамдаас гаргасан. Гэвч  сургууль, цэцэрлэг дээр коронавирусний халдвар илрэх тоо тохиолдол огцом нэмэгдэх болсонтой холбогдуулан зарим ангийн хичээлийг цахим сургалтад шилжүүлж эхэлжээ. Тодруулбал, Өнгөрсөн баасан гарагийн байдлаар нийт 29 цэцэрлэг, сургуулийн 50 гаруй багш халдварт өртөж, 4100 гаруй сурагч хичээлдээ явах боломжгүй болсон тул цахим сургалтад шилжсэн байна. 

Энэ талаар талаар Нийслэлийн Боловсролын газрын Бодлогын хэрэгжилтийн хэлтсийн дарга Ц.Жаргалантуулын мэдээлж байгаагаар  "Нийслэлийн хэмжээнд ерөнхий боловсролын 280 сургууль үйл ажиллагаа явуулж байна. Үүнээс 260 нь Боловсрол шинжлэх ухааны яамнаас гаргасан журмын дагуу 5:9 зарчмаар хичээллэж байгаа. Мөн төрийн өмчийн 19 сургууль танхимаар хичээллэж байгаа бол нэг сургууль цахим шилжээд байна. Мөн цэцэрлэгүүдийн талаарх мэдээллийг харьяа дүүргээс нь нэгтгэж байгаа. Баасан гарагийн байдлаар 18 цэцэрлэгийн 125 бүлгийн 2571, 11 сургуулийн 55 бүлгийн 1590 хүүхэд зайн сургалтад шилжсэн" гэсэн юм.